Yn pynkup burom ‘D Litt’ ka Skulbah USTM ia u Bah Lou Majaw bad u Zubeen Garg

Syllad | The Rising MeghalayaAugust 25, 2024

Ka University of Science and Technology Meghalaya (USTM) ka la pynbeit ban pynkup burom ia ki arngut ki riew pawkhmat ka thain shatei lammihngi (Northeast) ha ka Convocation kaba 10 jong ka ha ka 27 tarik Nailar.

U nongrwai ba pawkhmat ka Assam u Zubeen Garg bad u nongrwai pop-rock ba la rim na Meghalaya u Bah Lou Majaw kin shah pynkup da ka burom ‘D Litt’ degree kum ka dak ka jingithuh ia ka jingnoh synniang ba radbah ka jong ki sha ka put ka tem bad ka kolshor.

U Lat ka Jylla Meghalaya u CH Vijayashankar un sa pynkup ia kane ka burom Degree sha kine ki arngut ki riew pawkhmat ha ka jingïadonlang jong ki Vice Chancellor, ki riew shemphang, ki riew pawkhmat ha ryngkat ki hajar ngut ki samla pule.

U nongrwai uba don bun ki sap, u Zubeen Garg u dei u nongrwai, u nongthaw jingrwai, nongthoh jingrwai, nongpynmih jingrwai, u tyngshop, u nongpynmih phlim bad kiwei.

Katba u Bah Lou Majaw ia uba la tip bha kum u Bob Dylan ka India um dei satia tang u nongrwai, hynrei u dei ruh u nongthoh jingiathuh khana, u nongkynthoh halor ka imlang ka sahlang, halor ka kolshor ha kaba ki sur jingrwai ba khlain jong u ki pynasawa ia ka pateng kaba pynpaw ia ka khana jong ka jingieit, ka jingduh bad ka rukom im jong u Khasi.

Ka convocation kan sdang naduh ka por 11 baje mynstep ha Central Auditorium jong ka USTM. Baroh ki don 1,639 ngut kiba la pyndep ia ki kyrdan pule, na kine 17 ngut ki scholar kin ioh ia ki kyrdan PhD, 906 ngut ki samla pule kin ioh ia ki kyrdan Post Graduate, bad 716 ngut kin ioh ia ki kyrdan Undergraduate ha kane ka convocation.