Yn pynkup burom ka KSU Narpuh ia ki samla pule kiba wan shakhmat ha ki jingpule

Syllad | The Rising MeghalayaOctober 22, 2023

Ka Khasi Students’ Union (KSU) Narpuh Circle kan pynkup burom da kaba sam khusnam sha kito ki samla pule ka thain Narpuh kiba pass ha ki jingpule, kata kiba wan ha ki kyrdan ba nyngkong (1st Division) ha ki eksam SSLC, HSSLC, Degree, Master Degree, ICSE, CBSE bad ki lain pule bapher bapher jong une u snem 2023.

Ia kane ka jingsam khusnam kaba la tip kum ka “12th Mait Shaphrang Academic Award 2023” yn sam ha ka jingialang ka ban long ha ka 31 tarik mynta u bnai ha Divine Word School, Lumshnong, East Jaintia Hills District ha ka por 12 baje nohphai sngi.

Kumta la kyntu ia kito ki samla pule kiba la dep ban aplai ban ioh ia katei ka khusnam kin sngewbha ban wan mih ha katei ka sngi bad ka jaka ba la kdew haneng.

Shuh shuh ha katei kajuh hi ka sngi yn pynkup burom da kaba ai momento sha kito ki khynnah skul kiba wan ha ka kyrdan ba nyngkong, ba ar bad ba lai ha ka jingiakop thoh Slogan Writing bad Drawing Competition kaba la dep ban pynlong naduh ka ka 5 tarik u bnai Jylliew 2023, kaba dei ka sngi kyrpang pynneh mariangWorld Environment Day).

Na bynta kane ruh la kyntu ia kito ki khynnah skul baroh kiba la iashim bynta ha katei ka jingiakop na sngewbha ban wan mih na ka bynta ban ioh pdiang ia kane ka khusnam.Kane ka long katkum u kyrwoh lyngba u samla Chanmi Syrti, Education Secretary KSU Narpuh Circle.