Yn pynkyndit tyngeh ka UDP ha kane ka elekshon MDC ha Rilum Khasi Jaintia: Metbah

Syllad | The Rising MeghalayaJanuary 21, 2025

U President ka United Democratic Party (UDP) u Bah Metbah Lyngdoh ha ka 20 tarik Kyllalyngkot u la kam ba ka party kan sa pynkyndit tyngeh ia baroh ha kane ka elekshon ka ban wan ha ki artylli ki Autonomous District Council (ADC) ha Rilum Khasi Jaintia ka ban long ha ka 21 tarik u Rymphang.

Hadien ka jingpynbna ia ka thup kyrteng kaba lai jong ki kyrtong, u Bah Metbah u la pynpaw sha ki lad pathai khubor da kaba ong, “Nga pynthikna sha phi ba ha kane ka kynti kaba mynta ka long kaba phylla ba ngi la ioh ia ki kyrtong kiba biang bad ngin sa sakhi ia ka jingiakhun kaba itynnad bha bad ka ban sa pynkyndit ruh ia baroh.”

U la ong ruh ba ka party ka la trei shitom bha ban pynthikna ba kan thaw ia ka Executive Committee ha KHADC bad JHADC.

“Na kata ka daw ngi la bishar bniah bha ia ki kyrtong. Ka la kham shim por khyndiat hynrei watla katta ngi pynpaw shai ba ki kyrtong ha kane ka kynti kim dei satia tang ban shu pyndap ia ki seat ban iakhun ia ka elekshon hynrei ki kyrtong kiba la biang bha na baroh ki constituency kiba ngi pynieng,” u la ong.

Une u heh ka UDP u la ong ruh ba ka rai jong ka party bad ka paralok kaba ia don lang ha ka Regional Democratic Alliance (RDA), ka Hill State People’s Democratic Party (HSPDP) ba kan ym don ka jingiatreilang ha ka elekshon khnang ba kan ym ktah ia ka jingkyrmen jong ka party ha kane ka elekshon ka ban wan.

U Bah Metbah u la beit beit ia ki jingkynnoh pyrshah ia ka UDP ba ka dei ka paralok jong ka MDA da kaba ong, “Ngam tip ha kano ka nongrim phi kylli ia nga ia kata ka mat. Shah ngan pynkynmaw ia phi ba ha ka elekshon 2023, ngi la don hapoh ka MDA-1 bad napdeng ki 60 tylli ki seat ngi la ioh 12 seat, kumta ka jingkylli jong kata ka jingdon ha ka sorkar nga tharai kam mih satia.”

Na ka liang u MLA ka Sohiong u Bah Synshar Kupar Roy Lyngdoh Thabah u dei napdeng ki laingut ki kyrtong ba la pynbna da ka party hynne ka sngi Nyngkong ban iakhun ia ka elekshon sha ka KHADC. Ki arngut kiwei pat ki kynthup ia u Bah Anthony Khongwang na Nongskhen bad u Bah Lee Trevor B Bareh na Jirang. Katba sha ka JHADC ka party ka la rai ban pyniakhun da u Bah Meiowan Pasi na Nangbah Mihmyntdu.

Haduh mynta, ka UDP ka la dep pynbna ia 22 ngut ki kyrtong sha ka elekshon ha KHADC bad 17 ngut sha ka JHADC.

Katkum ka jingpynpaw jong u Bah Metbah ia ka thup kyrteng ba khatduh jong ki kyrtong yn sa pyllait ha kine ki shisngi arsngi ban wan.

U la pyntip ruh ba ka party ka la dep ban pynkhreh ia ka manifestor sha ka elekshon MDC ia kaba yn sa pyllait shen.