Yn pynkynriah noh ia ka Police Reserve sha Tynring

Syllad | The Rising MeghalayaMarch 27, 2025

Da ka jingthmu ban pynduna ia ka jingkhapngiah ka sor Shillong, ka sorkar Jylla ka la rai ba kan sa pynkynriah noh ia ka Police Reserve kaba don ha Jail Road shapoh Tynring.

Haba pyntip ia kane hadien ka jingialang ka kynhun Myntri kaba la long haka 26 tarik Lber, u nongaiktien ka sorkar u Bah Paul Lyngdoh u la ong, “Khnang ban pynduna ia ka jingkhapngiah ka sor Shillong, ia ka Police Reserve yn pynkynriah noh shapoh Tynring kaba don ha ka thain jong ka New Shillong Township. Na ka liang ka kynhun Myntri ruh ka la ai ka jingmynjur ia kane ha kane ka sngi.”

“Ka sorkar kan mang ia ka jaka kaba heh 50 akar na ka bynta ban tei ia ka Police Reserve kaba thymmai ha Tynring bad kane ka jaka kan long ruh kum ka lynti pdeng hapdeng ka Administrative City bad ka Knowledge City jong ka New Shillong Township,” ula ong.

Haba kylli, u Bah Paul u la ong ba ka jingpyniaid ia ki kam ki jam kan sdang noh shen na ka bynta ban tei ia kane ka Police Reserve kaba thymmai.

“Ka jingthmu ka long ban pynduna ia ka jingkhapngiah ha katei ka thain bad ia ka jail ruh yn pynkynriah noh, bad ia ka jingtyrwa halor kaei kaba yn leh ha katei ka jaka ynda ka la thylli yn sa khmih da ka Tnad pynroi sor. Ngin kynriah shwa sha New Shillong bad hadien ngin sa rai kaei kaba ngin leh ha kaba iadei bad kane ka jaka ha Police Reserve ynda ka la thylli bad ia ka jail ruh yn pynkynriah noh, bad ngin sa shim ia ka rai namar ki jingdonkam jong ka nongbah ki long kiba bun bad ia kine baroh yn sa bishar bniah da ka tnad ba dei khmih,” u la bynrap.