Yn pynlong ka Balang Katholik da ka jingiaid rally ba jar jar na ka bynta ka jingsuk ha Manipur

Syllad | The Rising MeghalayaJuly 29, 2023

Ka Catholic Association of Shillong kan pynlong da ka jingiaid rally kaba jar jar ha ka 5 tarik u Nailar 2023, ka ban sdang naduh ka por 10 baje mynstep na ka bynta ban pynioh pat ia ka jingsuk hapoh ka jylla Manipur.

Na ka laing u Archbishop ka Archdiocese Shillong, u Victor Lyngdoh u la ong ba ia kane ka rally yn sdang na Madan Iewrynghep, Laitumkhrah hajan Fire Brigade bad yn pynkut hapoh Don Bosco Stadium, Laitumkhrah, Shillong.

U Archbishop u la ong ba ha ki bnai kiba la dep ki la pynlong ia ki jingduwai na ka bynta ka jingsuk ha ka pyrthei bad ruh ha ka rukom kaba kham kyrpang ha kaba iadei bad ka jingsuk hapoh Manipur. Kumta ruh u la wer ban bteng ia ka jingduwai na ka bynta ban lah ban pynioh pat ia ka jingsuk hapoh kane ka jylla ba marjan.

“Ki la sakhi ia ki kam thombor pyrshah ia ki kynthei, ka jingthang dusmon ia ki iing ki sem, ka jingpynjulor ia ki jaka mane Blei, ka jingphet shnong jong ki briew bad ka jingiap namar ka jingiaumsnam,” ong utei u nongialam niam ka Balang.

Shuh shuh u la ong; “Ngi burom ia ka hok longbriew manbriew jong ki para briew ha kane ka imlang sahlang kaba lah shai, bad halor kine ki jingleh kam thombor pyrshah ia ki kynthei, ngi pyniasoh lang bad ka Catholic Association of Shillong kaba la khot pynlong ia kane ka jingiaid rally kaba jar jar.”

Ha ka juh ka por u khot u wer sngewbha ruh ia baroh ki nongshong shnong ka jylla Meghalaya ba kin wan ban iashim bynta ha kane ka rally.