Yn pynlong ka HYC da ka jingleit tur paidbah sha secretariat ha ka 8 tarik Naiwieng ba pulom ka Sorkar halor u drok

Syllad | The Rising MeghalayaOctober 20, 2024

Ka seng Hynniewtrep Youth Council (HYC) ka la shim ia ka rai ban pynlong da ka jingiakhih tur paidbah shapoh secretariat ha ka 8 tarik u Naiwieng ban pynpaw pyrshah halor ka jingpulom ka Sorkar Jylla ban pyntreikam ia ki hynniew tylli ki mat jingdawa ha ka jingiakhun pyrshah ia ka jingjyllei jong u drok ha ka Jylla khamtam ha kane ka nongbah Shillong.

Halor kane ka HYC ka khot ka wer ia ki paidbah nongshong shnong ka Jylla ba kin ia mih paidbah bad iasnohkti lang bad ka Seng halor kane ka mat da kaba iashim bynta ha ki jingialang paidbah ki ban pynlong ha kylleng ki jaka hashwa ban pynlong ia kane ka jingleit tur paidbah sha Secretariat.

Kine ki hynniewtylli ki mat jingdawa kiba ka seng HYC ka la phah sha u Myntri Rangbah ka Jylla ki kynthup ia ka jingbuh ia ki jaka sumar ne ka Rehabilitation center khamtam ha ka Nongbah Shillong, ka free Detoxification (OST) bad Day Care Center ha baroh ki district kiba u drok u jyllei, ban thaw da ki Fast Track Courts /Special Court na ka bynta ki case hapoh ka NDPS Act, ka jingtohkit bad tian bishar ia ki case hapoh ka NDPS Act, 1985, ban tehlakam halor ki kam khaii drok hapoh ki kyndon Narcotic Drugs and Psychotropic Substances Act, 1988 (PIT-NDPS Act), ban pynkhlad ia ki lad jingiada na ka jingwan rung jong u drok ha ka Jylla bad ban wanrah ia ka ophis jong ka Tnad Narcotics Control Bureau (NCB) ha Shillong.

Haba kren sha ki lad pathai khubor ha ka 19 tarik u Risaw u President ka HYC, u Bah Roy Kupar Synrem u la kam ba kine ki hynniew tylli ki mat jingdawa jong ka Seng ki dei kiba la don lypa hapoh ka Drug Reduction and Action Mission (DREAM) ia kaba la pynbna da ka Sorkar Jylla ha u snem 2023, hynrei kiba ki jingpyntreikam kat haduh mynta kim pat shym la paw satia.

U la kynthoh ruh da kaba ong ba ka jingkam jong ka Sorkar Jylla halor ka jingpyntreikam ia ka DREAM project hapoh ka Jylla ka long tang ka jingphohsniew namar haduh mynta ki kam kim pa shym la paw satia.

Nalor kata u la ong ba ka Sorkar Jylla ka dei ban sngewthuh shai ba ka thma pyrshah ia u drok kam dei tang ka thma jong ka Seng HYC hynrei ka dei ka jingialeh jong baroh ki paidbah ka Jylla kiba don ka jingsngewkhia kaba jur na ka bynta ka miat ka miat hapoh ka imlang ka sahlang hi baroh kawei.

Hashwa katei ka jingleit tur paidbah sha Secretariat ka Seng HYC kan pynlong da ka jingialang paidbah ha ka 25 tarik u Risaw ha Iew Umsning, 28 tarik ha Nongstoin, 29 tarik ha Nongpoh, 30 tarik ha Iawmusiang, Jowai, 31 tarik Risaw ha Iew Mawkyrwat, 1 tarik Naiwieng ha Khliehriat, 2 Naiwieng ha Mairang nalor kiwei pat ki jingialang ha kylleng ki shnong ha ka nongbah Shillong kaba kynthup ha Mawlai, Upper Shillong, Mawprem, Rynjah bad Mawryngkneng.

Kumta na ka liang ka Seng HYC ka pan ia ka jingkyrshan ba radbah na ki paidbah nongshong shnong ka Jylla da kaba kyntu ruh ba kin wan ban iasnohkti lang ha kane ka thma ban rat dyngkhong ia drok na kane ka Jylla khamtam khamtam ha ka nongbah Shillong.