Yn pynlong ka MBBA bad ka MYA da ka jingiakop pyni dohksah bad yoga

Syllad | The Rising MeghalayaSeptember 12, 2023

Ka Meghalaya Body Builders’ Association (MBBA) ha ryngkat ka Meghalaya Yoga Association (MYA) kin pynlong ia ka “47th State Body Building Championship bad ka “42nd State Yogasana Championship” ha ka 30 tarik mynta u bnai hapoh Aurobindo Institute of Indian Culture, Shillong naduh ka por 1 baje nohphaisngi.

Nalor ka jingiakop pyni dohksah hapdeng ki nongiakop kiba dei ki shynrang, kan don ruh ka jingiakop ban pyni ia ka jingbiang met biang phad ne ‘best physique’ hapdeng ki shynrang bad kynthei.

Na ka liang ka Kong CJ Bamon General Secretary ka MBBA bad u B Deb Genl Secretary MYA lyngba une u kyrwoh ki pynpaw ruh ba kan don ruh ka selection trial na ka bynta ka Zonal bad National Body Building bad Yogo.

Ka jingshim jingthew yn pyndep na ka bynta baroh ki nongwan iashim bynta ha ka 28 tarik mynta u bnai naduh ka por 4 baje janmiet shaneng hapoh He Man Physical Institute, Jail Road, Shillong.

Ki lahduh ha kane ka jingiakop ‘Body Building’ bad ‘Best Physique’ na ka bynta ki shynrang kin ioh ban rah da ka song pisa. Kumjuh ka khusnam kaba da ka song pisa kan leit ruh sha ki nongjop ba shimet ha ki jingiakop kynhun hapdeng ki shynrang bad kynthei kiba ha la ki jong ki jingkhia, bad ruh ha kaba iadei bad ki nongjop ha ka yoga.

Ha katei ka sngi yn ia don lang ruh ka Dr Ampareen Lyngdoh, Myntri ka Tnat ka koit ka khiah ka sorkar jylla kum ka Kongsan bad u Bah Fantin Joseph Lakadong, MDC  kum u Symbud Kongsan.