Yn pynlong ka MMO ia ka jingiakop Miss Meghalaya & Miss Teen Meghalaya 2023

Syllad | The Rising MeghalayaJuly 28, 2023

Ka Miss Meghalaya Organization hapoh ka shatri jong ka Meghalaya Youth Tourism Development Society sa shisien pat ka pyntip ba kan pynlong ia ka jingiakop thei bhabriew ba la tip kum ka ‘Miss Meghalaya’ bad ‘Miss Teen Meghalaya 2023.’

Ia kane ka jingiakop yn sdang lyngba ka Audition ha ka 12 tarik u Nailar 2023 hapoh Youth Hostel Shillong. Ki lahduh ha ka ‘Miss Meghalaya’ bad ‘Miss Teen Meghalaya’ kin ioh ban mihkhmat ia ka jylla ha ka rynsan jong ka thain bad hapoh ka ri. Ia ka Grand Finale yn pynlong ha ka 9 tarik u Nailur 2023 hapoh U Soso Tham Auditorium.

Nalor kiwei pat ki khusnam ki nongjop ha kane ka jingikop kin ioh rah ia ka song pisa kaba long T. 2.80 lak. Kane ka jingjop ka ban iaid shibnai kynthih kan sdang lyngba ki jingai jinghikai pyntbit ka ban neh kumba shiphew sngi, kata naduh ka 28 tarik u Nailar haduh ka 8 tarik u Nailur 2023.

Ka jingpynlong ia kane ka jingiakop ka thmu ruh ym tang ban kyntiew ia ka jinglong jingman ba shimet jong ki hynrei ruh ban long ka nuksa kaba kongsan hapoh ka imlang ka sahlang.Kane ka rynsan iakop ka dei ruh u mawjam na ka bynta ki kynthei kiba don ia ka jingngnud ban rung ha ka kam modeling, ak phlim lane ki kam kren paidbah.

Nalor kata kane ka jingiakop ka long ruh kum ka rynsan ba khlainbor na ka bynta ban pynshai paidbah halor ki mat kiba kongsan ha ka imlang ka sahlang.

Naduh kine ki snem kiba la dep, ki nongjop ha ka jingiakop ‘Miss Meghalaya’ ki la ioh ia ka lad ban mihkhmat ia ka jylla ha ki jingiakop thei bhabriew bapher bapher hapoh ka thain bad ha ka ri baroh kawei.

Ka samla Irene Dkhar kaba la jop ia ka ‘Miss Meghalaya’ ha u snem 2022 ka la ioh lad ban mihkhmat ia ka jylla ha ka Miss Northeast 2022, ha kaba ka la ioh ia ka jingjop. Ka la shah jied ruh kum ka Femina Miss India Meghalaya 2023 bad ioh ban mihkhmat ia ka jylla ha ka jingiakop kaba kham shalor, kata ka  ‘Femina Miss India 2023.’

Ia kane la pynbna ha ka jingialang bad ki lad pathai khubor mynta ka sngi lyngba ki dkhot  ka Miss Meghalaya Organization, kiba kynthup ia u Bah Brian Wallang uba dei u riew shemphang ha ka pule dangle bad ha kaba iadei bad ka riam ka beit, ka Rochelle Wahlang ka nongtrei kam lajong kaba la jop buntylli ki pansngiat ha ki snem kiba la leit noh kynthup ia ka khsusnam Miss Meghalaya.

Shuh shuh ha kane ka jingialang la ia don lang ruh u president bad secretary ka Meghalaya Tourism Youth Development Society, kiba kynthup ia u Bah Dominic Savio Diengdoh, u Bah Daniel Khongsit bad  Bah Shanbor Khonglah.