Yn pynlong ka MSOA da ka jingiakop mareh thong “5K Fitness Run”

Syllad | The Rising MeghalayaAugust 23, 2023

Shibynta jong ka National Sports Day 2023, ka Meghalaya State Olympic Association (MSOA), ka Directorate of Sports & Youth Affairs (DSYA) bad ka District Sports Officer, East Khasi Hills kin pynlong da ka jingiakop mareh thong ba la tip kum ka “5K Fitness Run” ha ka 26 tarik mynta u bnai.

Na ka liang u Bah Finely L. Pariat, General Secretary lyngba une u kyrwoh u pyntip ba yn sdang ban pyndep ia kane ka jingiamareh thong na SSA Stadium Main Gate napoh madan Polo, Shillong. Kiba kwah ban iashim bynta ki dei ban wan aijingtip ha ka por 6 baje mynstep ha katei ka sngi 26 tarik, katba ka jingiamareh kan sdang ha ka por 6:30 mynstep.

Ia ka registration yn pynlong hapoh ka ophis ka District Sports Officer, Shillong ha ki kynta bad por long trei naduh ka 22 haduh ka 25 tarik mynta u bnai.

Kumta la khot bad sngewbha ia baroh ki shynrang bad kynthei ba kin wan iashim bynta ha kane ka jingiamareh. Na ka liang ki nong pyniaid kin sam ei ia ki T Shirt na ka bynta baroh ki nongwan iashim bynta.

Ha katei ka sngi ym sam ei ruh ia ki jingbam sha baroh ki nongwan iashim bynta bad yn sam ruh ia ki 50 tylli ki jingai sngewbha ba kyrpang sha ki nongiamareh kiba donbok.

Ka jingpynlong ia kane ka jingiamareh thong ka thmu ban kyntiew ha kaba iadei bad ka koit ka khiah bad ka jingsmat jingsting hapdeng ki nongshong shnong ka jylla naduh kiba dang samla haduh kiba la san.