Yn pynlong prokram aijingsumar ei ka NEIGRIHMS, Health Dept bad kiwei ki kynhun seng ha Khliehtyrshi, West Jaintia Hills

Syllad | The Rising MeghalayaSeptember 28, 2023

Ka North Eastern Indira Gandhi Regional Institute of Health & Medical Sciences (NEIGRIHMS) ha ryngkat ka jingiatreilang bad ka Tnat ka koit ka khiah ka West Jaintia Hills, ki kynhun seng jong ka thain, ka Rotary Club Jowai, JHPIEGO, NESFAS, ka VHAM bad ka  Molbio Diagnostics ki la pynkhreh ban pynlong da ka prokram aijingsumar ei ne ka ‘free health camp’ hapoh North East Adventist University, Khliehtyrshi West Jaintia Hills District ha ka 10 tarik u Risaw 2023 ka ban sdang naduh ka por 9 baje mynstep.

Ha kane ka prokram yn ai jingsumar ei da ki doktor ha kaba iadei bad kiba bun jait ki jingshitom kiba iadei bad ka kam kha kam pun, kiba iadei bad ki khynnah, shitom ha ki shkor, khmut bad ryndang nalor kiwei pat ki jait jingshitom.

Nalor kata kan don ruh ka jingleh ia ki test ban pynthikna ha kaba iadei bad ki jait jingshitom kum ka tuberculosis, cervical cancer, breast cancer, malaria, dengue, chikungunya, sexually transmitted diseases (STDs), influenza, respiratory diseases, scrub typhus nalor kiwei pat.

Kan don ruh ka Integrated Counselling & Testing Center (ICTC) van kaba la pynkhreh ha ryngkat ki kor ki bor ban leh ia ki test halor u khniang jingpang HIV bad Syphilis, ban ioh jingtip halor ki lad jingiada na ka HIV, ka jingiasyllok na ka bynta jong ki ban leh ia ki test bad ruh halor ka jingpyniasoh ia kito kiba ioh positive bad ki lad jingsumar bad jingkyrshan na ka bynta jong ki.

Nalor kata kan don ruh ka jingpyniasoh halor ki lad jingsumar ha ki tnat ba la pyniaid da ka sorkar hapoh ka NHM bad medicine. Kan don ruh ka jingiasyllok ba kyrpang halor ka koit ka khiah jong ki khynnah kiba dang sdang khie sdang san, STDs. TB, HIV, Malaria, Cancer (breast and cervical) bad kiwei kiwei ki jait jingpang jingshitom.

Shuh shuh kan don ruh ka jingpynshai halor kiba bun ki mat kiba iadei bad k koit ka khiah kynthup ha kaba iadei bad ka jingai tika ia ki khynnah kiba haduh ha 5 snem rta lyngba ka Intensified Mission Indhradhanush (IMI 5.0). Nalor kata kan don ruh ka jingiasyllok ha kaba iadei bad ka rukom bam bad ka jingai jingmut lyngba ki riewshemphang, ka jingpynshai halor ka Meghalaya Health Insurance Scheme (MHIS), Aadhar registration bad halor ka jingplie ia ki bank account.

Ka jingleh ia ki tes bad ka jingai jingsumar ha kane ka sngi kan long katkum ki jingai jingmut ba la mynjur da ka WHO ha kaba iadei bad ki kot ki bor na ka bynta ki jait jingpang bapher bapher. Kane kan dei ruh kasien kaba nyngkong eh ha ka jylla ha kaba yn lah ban ai ia ka jingsumar kaba sted ha kum kine ki prokram da kaba pyndonkam ia ka  RT-PCR technology.

Ka jingleh ia ka registration ka bym donkam jinglut kan sdang naduh ka por 8 baje mynstep haduh ka por 2 baje nohphai sngi.