Yn pynlong shlem bah ïaka SAI training centre ha Shillong ong u Kiren Rijiju haba plie iaki ar tylli ki jaka ialehkai

Syllad | The Rising MeghalayaJanuary 4, 2021

U Kiren Rijiju, Myntri ka sorkar kmie ba dei khmih iaka Youth Affairs bad Sports haka lah sngi u Blei u la wan ba un plie ia ki artylli ki madan kaba kynthup ia ka madan ialehkai jong ka athletic bad kumjuh ia ka madan ialehkai Phutbol, kiba dei jong ka Sports Authority Of India kaba don ha kut jong ka skul bah North Eastern Hills University.

Ka madan ialehkai athletic ka dei kaba la tip kum ka synthetic track katba ka madan ialehkai football ka dei ba la siang da u artificial turf ba la ithuh bad ba la mynjur ban pyndonkam ia ka da ka Fifa.

U Rijiju u la ong ba ka nongbah Shillong kam dei tang ka nongbah ba itynnad hynrei ka dei ka jaka kaba biang eh naka bynta ki jait jingialehkai baroh. “Kampher wat la kam da dei than eh kaba don ha ki kynjang lum kiba kham jrong, pynban kaba lah pat ban shim ne niew ia ka kum kawei na ki high altitude training centre bad kaba lah ban pynneh ia ka shi junom, ha kaba ki nongialehkai ki lah ban wan ban kilan kyrpang sha kane ka jaka,” ula ong.

“Ka jylla Meghalaya ryngkat ki jylla ki thain shatei lam mihngi kaba la lah ba kan sei ia kiba bun ki rang ne ki thei ialehkai kiba kynsai na kane ka thain, hynrei ka jingbym biang ka rukom ban ai jinghikai kiba paka ne ka jingbym biang bha katta ka rukom ban wad bniah ia ki sap ialehkai ba nylla ba ki khynnah ki don kaba pynlong pat ia ka jingeh ban nym lah ban sain dur ia ka sap ka phong ba ki khynnah ka thain ki don,” la ong u Rijiju bad bynrap ba ula buh ha u ia kawei ka thongbah bad katta ka long ba katban da poi ka lympung bah Olympic u snem 2028, ka India ka dei ba kan rung ialade ha ka thup ba shiphew napdeng ki ri ba iashim bynta ha kane ka lympung ha ka liang ka jingioh khur ia ki takma, ha kaba ban lah ban kynjoh ia kane ka thong, ka jylla shatei lam mihngi ka don bha ia ka bynta ba kan lah lem ban iarap ban pynurlong ia kane ka thong.

U Myntri u dang buh jingmut ban nang pynkha shuh shuh ia kum kine ki jaka ai jinghikai ba kyrpang kum ka Arunachal, Mizoram ne sa kawei hangne ha ka jylla Meghalaya.

“Shen ngan sa shong biang ia ka jingialang ban pyrkhat sani bha sa ia kwei pat ki jait kam kiba dang lah shuh shuh ban dang bsut ha kane ka shlem ai jinghikai jong ka SAI bad ryngkat ka jingiatreilang bad ki bor ba dei khmih ka skul bah NEHU, yn sa lah pat ban pynlong ia kane ka shlem ai jinghikai kum kawei na ki shlem bah ne centre of excellence jong ka ri,” la ong u Kiren Rijiju.

Kiba la ai jingkren lang ha kane ka sgi ka kynthup ia ka jingkren pdiang sngewbha na u Regional Director ka SAI u Dr Subhash Basumatry, Jt. Secretary bad Director jong ka tnat Sports & Youth Affairs kong WAM Booth bad la sakhi lang ia kane ka sngi da Deputy Commissioner bad Superintendent of Police East Khasi Hills kong Isawanda Laloo bad bah Sylvester Sylvester Nongtnger, ki ophisar ka SAI ka tnat Sports ka sorkar Meghalaya bad ki khynnah ba shah hikai ha kane ka shlem.