Yn pynpra hi noh ka ECC ia baroh 34 tylli ki Coke Factory ha Elaka Sutnga

Syllad | The Rising MeghalayaOctober 9, 2021

Ka jingialang kaba pynlong ka Environment Coordination Committee (ECC) ka Elaka Sutnga haka sngi Saitjain kala rai ban leit pynpra noh hi ia baroh 34 tylli ki Coke Factory ne ki karkhana saiñ rnga dewiong kiba la kynnoh bala tei beaiñ ha katei ka elaka.

“Ngi naka liang ki khun ka Elaka ngin sa leh iakaba donkam bad ka sorkar kan hap ban shim iaka jingkitkhlieh. Ki Nongshong shnong jong ka Elaka baroh ki dang ap iaka rai jong ka sorkar kumno kan leh ia kine ki coke. Lada kam lah ban leh kumba la kular, ki khun jong ka Elaka kin leit ban pynpait pynpra lut iaki.” la ong u general secretary ECC Ma Pynbait Sutnga.

Ha kane ka jingialang kaba long ha Moolamylliang la iahimbynta ka Women`s wing ECC, ki Waheh Shnong bad katto katne ki riew rangbah jong ka thain Elaka Sutnga.

U Ma Sutnga ula ong ba ka ECC ryngkat bad ki khun ka Elaka kala dep ban leit jurip ia kine ki kharkhana bad kila lap bad kynnoh ba baroh ki coke factory ki pynkhein ia ki kyndon ba la buh kaba la pynbitar iaka ECC bad ki nongshong shnong ka elaka.

“Ha ka jingiadei bad ka coke factory jong u Minister PHE uba la dep ban kren ha ki khubor paidbah ba un sangeh noh lada ka ktah ia ka jingim jong ki parabriew, hynrei kaba sngewsih ka long ba u Minister u dang pyntrei beit haduh mynta wat la um pat don ki kot ki sla, hynrei u dang pynmih ia u coke haduh kane ka sngi. Dei halor kane ka nongrim u Minister um shem la burom ia ka jingkren jong u ha ki khubor paidbah. Kane ka factory jong u kaba kyrteng ka Northeast Carbon Industries katkum ka RTI ngi lap ba ka dei ban don ha ka shnong Mynska West Jaintia Hills District, hynrei u wan buh pat iaka sha ka Elaka jong ngi. Bad na ka liang jong ngi ngi dawa ba u dei ban kynriah noh iaka shi syndon na kato ka jaka ba ka don. Lada um lah ban kynriah na ka liang jong ki khun ka Elaka ngin sa leh ia kaba donkam,” la ong u Ma Pynbait ha u kyrwoh.

Shuh shuh ula ong “ha ka jingiadei bad kine kiba la don iaki kot ki sla kiba ka sorkar ka la dep ban ai, na ka liang jong ki khun ka Elaka Sutnga ha ka jingleit jurip jong ngi ha ka 27th September 2021 ryngkat ka jingdonlang jong u Deputy Commissioner ngi shem ba kine baroh ki pyntrei be-ain naduh ka rukom thang ka jong ki bad ki jakhlia kiba na kine ki coke factory ki shu bret pathar khlem da bud iaki kyndon jong ka Pollution. Ha kane ka jingleit jurip jong ngi, ngi lap ki don ki khynnah kiba dang rit kiba ki pyntrei be-ain ha kine ki coke factory bad ha kajuh ka por kine ki coke factory kim don ia u filter kumba la bthah da ka sorkar ban buh  kiba long ki lad jingiada ia ka mariang bad ia ki nongshong shnong. Bad dei halor kane ka nongrim na ka liang jong ngi ki khun ka Elaka Sutnga ngi kyrpad iaka sorkar ba kan khang noh iakine kiba la don ki kot ki sla. Ha kajuh ka por na ka liang u Deputy Commissioner u la dep ban kular hakhmat jong ki khun ka Elaka ba un ai da ka FIR ia kine ki coke factory bad ha kajuh ka por u DC u la dep ruh ban ong lada ki dang pyntrei iaka kam un sa phah kem lut ia ki namar kim shem la bud iaki kyndon jong ka ain, hynrei kaba sngewsih ka long ba haduh mynta na ka liang jong ka office jong u Deputy Commissioner kam pat leh eiei ruh em. Kane ka pynduh ia ka jingshaniah ka jong ngi ki khun ka Elaka ia ka sorkar hi baroh kawei.”

“Ngi dap da ka jingsngewsih ban iohi ia ka jingkren jong u Minister Incharge jong ka Mariang u James Sangma uba ong ba ka sorkar kam lah ban khang iakine ki coke factory namar ba ki iaid katkum ki kyndon kiba biang, hynrei ha ka jingleit jurip jong ngi ryngkat bad ka office jong u Deputy Commissioner ha ka jingiadonlang lang ka Police Department ngi shem ba baroh ki trei be-ain. Na ka liang jong ki khun ka Elaka sutnga ngi kyrpad ia u Minister Incharge ban wan jurip da lade khnang ba un lap ia ka jingshisha namar ngim hun ba u shu kren na ka office jong u khlem da tip ia ka jingshah kthah jong ki khun ka Elaka,” ula ong ma Pynbait bad bynrap ba ka ECC ka la iohi ia ka jingkuman jong kane ka sorkar kaba mynta kaba shu kwah ban pyniap lut ia u khun jong ka Elaka baroh bad kam shem la burom ia ka ECC watla kala iaid da ka lynti kaba jai jai.