Yn pynshitom ia kiba pynkhein aiñ COVID-19 ha Ri Bhoi

Syllad | The Rising MeghalayaJuly 17, 2020

Ka Synjuk Nongsynshar Shnong Ri Bhoi Mihngi ban tem iaka jingpur bad jingiabit khlam jingpang COVID-19, kaba tang ha Ri Bhoi ki don haduh 31 ngut kiba la bit ia kane ka jingpang kala shim iaka rai kaba tyngeh ban pynshitom ia kiba leh pyrshah iaka jingbthah jong ka sorkar ban iakhun pyrshah bad ban iada na ka khlam.

Ka Synjuk Nongsynshar Shnong Ri Bhoi Mihngi kala pynlong jingialang ka 16^th July 2020 ha CHC Bhoirymbong ha ka jingiadonlang u Bah George B Lyngdoh MLA Umroi Constituency, Bah Rangkynsai Kharbuki MDC Umroi Constituency, Bah R Kharbihkhiew MCS, Block Development Officer C&RD Block Bhoirymbong, i Medical Officer Incharge CHC Bhoirymbong, Officer Incharge Umroi PIC, Khapmara-Bhoirymbong, ki dkhot ka synjuk bad kiwei de ki Rangbah Shnong bad ki Riew Rangbah ka Shnong Lumdaitkhla,

Hadien ka jingiathir sani bha halor kumno ban tem iaka jingpur ka jingpang khlam ha Ri Bhoi kila shim ia kine ki rai harum:

Naduh ka 21^st July, 2020, ka area Ri Bhoi Mihngi  kan pyntreikam pura ia ki ain jong ka jylla bad ka Ri ban pynshitom bad fine ia kiba pynkhein ain ha kane ka por jong ka Khlam (Pandemic) Covid19, hapoh ka Epidemic Act 1897, IPC188, Covid19 Regulation Act bad Natural Disaster Act. Kino kino kiba pynkhein ia kitei ki kyndon ain yn pynshitom bad ngat ha ka fine, kumta la rai ruh ba ki Rangbah Shnong, Ki Officer, Ki Nongmihkhmat kin ym iarap ia uno uno uba pynkhein ain ha kum kane ka por. La ailad ruh ia ki Shnong ba kin buh ki kyndon Shnong jingpynshitom ia kiba pynkhein ia ki kyndon ain jong ka shnong kiba iadei bad ka jingiada na kane ka jingpang.

Baroh ki shnong kin pynbna paidbah sha baroh ban bud ia ki jinghikai jingkylla ha ka rukom im (Behavioural change Management) ban iada ia ka jingpang Covid19, da kaba pynkynmaw ia ki lai dak S.M.S kaba mut:
S- Social Distancing (ban ia jngai iwei ia iwei) ban lait jing ia bit jingpang
M- Mask (Ban deng mask haba mih na la ing bad deng ha ka rukom  ba dei ba kah ia ka Shyntur bad ka Khmut)
S- Soap/Sanitizer (Ban sait barabor ia ka kti da ka Um bad Sabon lane sanitizer)

Baroh ki dukan ha ki Shnong, kidei ban don jaka saitkti bad sabon, lane buh sanitizer, Ym shah banshong palat sawngut ha dukan, Ki Nongdie dukan baroh ki dei ban deng mask ban kim dei ban ai tiar ne marbam ia ki nongthied ki bym deng mask.

Ki dukan baroh ha byepass kim dei ban shah rung ia ki driver ne nongshong kali ba iaid na Assam lyngba ka Meghalaya sha Assam biang (Transit vehicle), ia ki driver ne nongbud kali kiba wan buh marbam ha ka thain ki dukan kin die jingbam da kaba shu song bad ai na jingkhang , ym dei ban shah ia ki ban shong bam ha dukan.

Ba baroh ki shnong kin khang ia ki paidbah ban leit iew Bhoirymbong lane Shillong lada kam dei ka jingdonkam ba kyrpang, ngi pynshlur ban leit sha kitei ki jaka tang lada donkam eh ban leit na ki daw bym lah kiar.

Baroh ki nongshim dawai sha ki PHC, CHC kidei ban leit da kaba bud ryntih ia ka jingpyniaid ki jaka sumar bad ban iai deng mask haba wan shah sumar ne shim dawai.

Ki Shnong baroh ki dei ban iatreilang bad ka rai ka Dorbar Shnong Lumdaitkhla halor ka jingpynbeit jong ka Dorbar ia ka iaid ka ieng bad ka iew ka hat ha Iew Bhoirymbong hapoh u pud synshar jong ka Dorbar Lumdaitkhla.

Baroh ki Shnong bad ki Nongshong shnong kim dei ban ibein lane iehnoh khlem jingiarap lada don ka ing ka sem kaba ngat ha kane ka jingpang. Baroh ki shnong kin iarap, bad treilang bad ki bor pyniaid ha ki ba bun rukom.

Ban khang ia ki tymmen ba la palat 60 snem shaneng bad ki khyllung hapoh 10 snem ban leit sha ki jaka paidbah.

Ban sumar khuid ialade, ka ing ka sem, ka shnong ka thaw, ban kiar na ka jingbam ba pyntlor ia ka bormet khnang ban lait na ka jing ioh kem pang ha kum kane ka por.

Ba baroh ki shnong, ki khang shwa ia ki kam khawai sngewbha, lane ban khang ia kiba wan khwai dohkha ne shangkai na kiwei ki district ne ki jaka ba jngai. Yn shah tang ha ki kam essential duty ne ki kam bymlah kiar.

Kino kino ki shnong kiba la phah sah Quanrantine ia ki Khynnah na shnong jongphi ha Mynken Higher Secondary School ha kine ki sngi bala dep Ki Rangbah Shnong jong kitei ki shnong kin sngewbha ban iarap naka Fund CCMC jongphi sha ka CCMC jong ka Lumsohpieng ynda phi la ioh fund ban iarap ia ki jinglut baroh bala nang pynlut ka CCMC Lumsohpieng. Phi lah ban siew ia kane sha Office U Block Development Officer (BDO) Bhoirymbong bad naka Office kan sa pynpoi ia ka pisa sha ka CCMC Lumsohpieng.

Ban kyntu ia ki Nongshong Shnong baroh ba don Smart phone ban Download na Playstore ia ka Mobile App “Behavioral Change Management” bala pynmih da ka Sorkar Meghalaya ban ioh ki jinghikai ba bun halor ka jingiada naka jingpang Covid19.