Yn pynthikna shuwa ka bor synshar district WJH ban pyndam iaka ktem Pulit ka Assam

Syllad | The Rising MeghalayaApril 28, 2021

Ka bor synshar district jong ka West Jaintia Hills kan pynthikna shuwa iaka jingkynnoh ba iaid beit ka jingpyntrei iaka ktem pulit jong ka Assam haka shnong Saba, kaba la pynsangeh haka 21 tarik une bnai.

U Deputy Commissioner u Garod LSN Dykes ula ong ba kin hap ban pynthikna shuwa iaka jingkynnoh ba bteng ka Assam ban tei iaka ktem pulit ha Saba. Ula ong ruh ba lashai ka sngi Palei ka bor district kan leit ban jurip ia katei ka jaka ban pynthikna.

Ia kane u DC ula ong hadien ka jingwan iakynduh bad ai dorkhat ka San Shnong Development Organization kaba kynthup ïaka Shnong Barato, Mukroh, Saba, Maitdeiñ bad Ïongkynshur kiba la dawa ban pynpra mardor ïaka jingtei ïing Border Outpost Police (BOP) da ka Assam ha haka jaka kaba khot Langhong Sangdathli, Saba kaba hap hapoh u pud u sam jong ka Meghalaya.

Hadien ka jingwan pynsangeh ka bor synshar district, ka Assam kala phah pyrton pulit ban pahara ban pyntrei shait shait ia kane ka ktem pulit kaba la pynshongsyier ruh iaki paidbah nongshong shnong ka thain la ong u President ka SSDO u Ma Hamboide Sumer uba dei ruh u Waheh Shnong jong ka Mukroh.

Nalor kata hadien ka jingjurip sa ki nongialam bad dkhot ka UHM haka 23 tarik kiba la shah thombor bad shah ktah ruh ha ki nong Karbi, kam long shuh kaba shngaiñ ïa ki nongleit nongwan ne kiba leit bri leit khyndew namar ba ki shah beh thong ha ki briew kiba pynthud iaka shongsuk shongsaiñ ha kine ki thaiñ, la iathuh u ma Sumer.

Ka Sanshnong Development Organization ka la dawa na ka sorkar ba kan shim khia kloi ban buh ïaka Border Outpost Police (BOP) haka shnong Saba ne Mukroh khnang ba ki nongshong shnong ha kine ki khappud kin shngaiñ haka leit ka wan.

“Ngi dawa ruh ba ka sorkar kan pynbeit noh kloi ïa u pud u sam hapdeng ka sorkar Assam bad Meghalaya namar lada u pud u sam un sahteng kumne shi kumne kan sa poi ka por ba ka Assam kan sa klun lut ïa ki jaka jong ka Meghalaya bad kan sa poi ruh ka por ba ki nongshong shnong kin long nongwei ha la ka jong ka ri namar wat mynta ruh ki nongshong shnong kiba don ha kine ki jaka ba khappud ki la shah knieh jubor ki jaka
jong ki bad ki shah thombor man la ka por ha ki bor jong ka Assam”, ong utei u nongïalam.

U MDC ka thaiñ u Aiborlang Shadap ula ong ka jingiasoi soskular hapdeng ka Jylla Meghalaya bad ka Jylla Assam ban pynneh pynsah ïaka Status Quo ka long ka bym don jingmut namar tang ka sorkar Meghalaya kaba burom bad bud ryntih ïaka soskular hynrei ka sorkar Assam ka bteng ban thom naphang da kaba pyntrei jubor ïaki skhim kiba bapher bapher ha ki jaka ïakajia khappud khnang ban nang pynskhem ïa la ka jingkam trai.

U MDC ula kyntu ïaka sorkar Jylla kaba ïalam da ka NPP ban pynbeit kloi ïa u pud u sam hapdeng ka Meghalaya bad Assam kumba la khei kular haka por ba ka ïalap Election ba u pud u sam dei ka thong ba hakhmat eh jong ka party NPP.