Yn pyntreikam ka Sorkar da u QR Code ha ka kyiad ban kyntiew ia ka jingpynmih khajna: CM

Syllad | The Rising MeghalayaSeptember 26, 2024

Ka sorkar Jylla ka la shim ia ka rai ban pyntreikam noh da u QR code ha ki mar ba la die da ka Tnad Excise ka Jylla khnang ban khanglad na ka jinglait ei bad khnang ban kyntiew ia ka jingpynmih khajna da 5 haduh 10 percent.

U Myntri Rangbah ka Jylla u Conrad K Sangma haba kren sha ki lad pathai khubor hadien ka jingialang ka kynhun Myntri ha ka 25 tarik Nailur, u la ong, “Ngi la mynjur ia ka jingtyrwa ban pyntreikam noh da u QR code na ka bynta ki mar bapher bapher ba la die da ka Tnad Excise, kata kaba mut ba man u bilor ban die ha Meghalaya kin don ia u QR code. Kane kan pynsuk ban lapdien ia ka jingiaid jong ki bilor khnang ban tip shano ki poi bad kiei ki dukan ba dei ban die bad lada don kano kano ka jinglait ei ka khajna.”

U la ong ruh, “Ngi khmih lynti ba kane kan iarap ban kyntiew hapdeng 5% haduh 10% ka jingpynmih khajna bad ka jingkhanglad ia ka jinglait tuh ki khajna kiba don ha kane ka rukom treikam kaba mynta da kaba pyndonkam noh da u QR code.”

Haba kylli, u Conrad u la ong ba ka jingkhmih lynti lyngba ka jingih lum khajna jong ka Tnad Excise lyngba kane ka sienjam kaba thymmai kan kiew da kumba 5 haduh 10 percent.

“Kaei kaba ngi la leh ha ki snem kiba la leit noh ki la iarap ia ngi. Dei na kata ka daw mynta ka jingpynmih khajna ka la kiew haduh lai shah haba ianujor ia kaei kaba long ha u snem 2017. Ka jingpynmih khajna ka la kiew haduh lai shah namar ki sienjam ba ngi la shim ha kine ki san snem kiba la dep. Ngi kyrmen ba kane ka sienjam kaba thymmai ruh ka dei kawei pat ka lynti ban khanglad ia ka jinglait tuh ka khajna bad ka ban iarap biang ban nangkyntiew ia ka jingpynmih khajna,” ong u Conrad.

Nalor kata u la pyntip ruh ba ka kynhun Myntri ka la ai ruh ka jingmynjur ia ka jingtyrwa ban ai noh da ka composite license na ka bynta ki hotel. “

U la ong ruh ba ha ki por kiba la dep ia ki license la ai sha ki hotel bapher bapher da kaba pynshong nongrim na ki restaurant lane ki Bar, kaba mut lada ka hotel ka don saw tylli ki Bar lane sawtylli ki restaurant, kumta ruh kin hap ban shim haduh saw tylli ki licence na ka bynta kawei pa kawei ka restaurant ne Bar.

Hynrei, u la ong, “Mynta ka jingthmu ka long ban ai noh kawei ka composite licence ia ka hotel baroh kawei, khnang ba kin ym donkam shuh ban aplai ia ki licence na ka bynta kawei pa kawei. Ka jingbuh dor kan long kaba kham heh haba ianujor bad ki licence jong ki bar.”