Yn pyntreikam ka Sorkar ia ka Parking Policy ban weng ia ka jingkhapngiah ha Shillong: Dhar

Syllad | The Rising MeghalayaMarch 22, 2025

U Symbud Myntri Rangbah ka jylla uba khmih ia ka Tnad pynroi sor, u Bah Sniawbhalang Dhar haka 21 tarik Lber u la ong ba ka Sorkar shen kan pyntreikam ia ka Meghalaya Urban Parking Policy 2025 ban tehlakam halor ka jingpynieng kali ha ki rud surok ha baroh ki jaka sor khnang ba kan iarap ban pyllait na ka jingdheng kali ha ka Nongbah Shillong.

Haba kren sha ki lad pathai khubor u Myntri u la ong, “Ka jingpyntreikam ia kane ka polisi pynieng kali kan iarap ban pynduna ia ka jingpynieng kali ha ki surok namar yn ym don ba lah ban shu pynieng katba mon ha ki surok.”

Katkum ka jingpynpaw ka jong u, u Bah Sniawbhalang u la ong ba ka jingpynieng kali thurmur ha ki surok ka dei kawei na ki daw bah kaba wanrah ia ka jingkhapngiah kali ha ka nongbah Shillong. “Kumta ka Tnad kan sa khmih ia ki jaka na ka bynta ban shah ban pynieng kali ha surok,” u la bynrap.

U la ong ruh ba kane ka Parking Policy kan thaw ia ki sienjam ban shim da ka dor kum ka bai pynieng kali ha surok bad ha kajuh ka por ba ki paidbah kim dei ban shu ieng klumar namar yn buh ia ki zone ha ki surok ha kaba ki lah ban pynieng ia ki kali bad ki jaka kiba kim lah ban pynieng.

Nalor kata, u Myntri u pyntip ruh ba ka sorkar ka la rai ban pynkynriah noh ia ka Secretariat sha New Shillong shibynta jong ki sienjam ban pynduna ia ka jingkhapngiah jong ka nongbah.

“Kane kan sa iarap shibun bad kum ka sorkar ngin dang bteng ban iamir jingmut ban shim ia ki sienjam ban pyrshang wanrah ia kiba bun ki lad ki lynti ki ban iarap ban pynduna ia ka jingdheng kali ha ka nongbah,” u la bynrap.