Yn pyntreikam noh ka Jowai Municipal Board iaka Solid Waste Management Rules 2016

Syllad | The Rising MeghalayaMay 17, 2022

Ban pynjem iaka jingeh ka ñiut kaba mih na kylleng ka sor Jowai, ka Jowai Municipal Board (JMB) ka la rai ban pynïakhlad (Segregate) ïaki ñiut hapdeng kiba pyut bad ki bym pyut da kaba bud katkum ka kyndon Solid Waste Management Rules, 2016.

Ïa kane la ïathuh u Chairman ka JMB u Ma Lasooki D Lakiang haba ïakren bad ki lad pathai khubor ha kamra treikam jong u haka sngi Nyngkong.

Ka kyndon Solid Waste Management Rules 2016 ka kdew shai ïaka jingdonkam ban pynïakhlad ïaki ñiut da kaba leh kumne kan pynduna ïaka jingmih ki ñiut.

Ula pyntip ba ka Board da ka jingïatreilang ki seng treimon sngewbha kynthup ka SURE bad ka Young Minds Collective bad ka Scouts & Guides kin pynlong ka jingpynsngewthuh paidbah ha man ki dong ki shnong, kumjuh ki skul ki kolej hapoh ka sor Jowai kumno ban pynïakhlad ïaki ñiut.

Ula ïathuh ba ka SURE kadei kawei ka seng treimon sngewbha kaba la ïaid shakhmat ban pynsngewthuh bad ai jinghikai ïaki nongshong shnong kumno ban pynkylla ïaki ñiut shaka spah bah.

U Chairman ula ïathuh kumba long mynta ka board ka dang duna ki nongtrei bad ka jingdon ki seng treimon sngewbha kiba shemphang ha kane ka kam kan ïarap shibun.

Ula pyntip ruh ba ka JMB kan sa khot jingïalang ïaka Synjuk jong ki rangbah shnong jong ka nongbah Jowai halor kane ka kam.

U Dr HH Mohrmen President ka SURE ula ïathuh ba ki ñiut kiba pyut kiba mih na ki ïing shetja lah ban pynkylla sha ka sboh kumjuh ka jingbam sniang, jingbam blang bad kiwei kiwei. Katba ïaki ñiut bym pyut lah ban pyllang bad katkum ka kyndon jong ka Solid Waste Management Rules 2016 ki karkhana kin hap ban shim ïaki.

Shuh shuh ula ong, katkum ka Rule 4. (4) ka Solid Waste Management Rules, 2016, lada don kino kino ki jingïalang kiba ka jingdon briew ka long palat ïaka 100 ngut kin hap ban pyntip shwa shaka Municipal khnang ban pynïakhlad ïaki ñiut bad lada ym pynïakhlad ïaki ñiut ka Municipal ka don hok ban kyntait kit ïaki ñiut.