Yn pyntreikam noh kloi katba lah ia ka Shillong Engineering College; ong u Myntri

Syllad | The Rising MeghalayaAugust 8, 2024

U Myntri ka tnad Pule Puthi u Rakkam A Sangma u la ong ba ka Sorkar ka la pynkhreh shaid shaid na ka bynta ban ioh pyntreikam noh kham kloi ia ka Shillong Engineering College kaba nyngkong eh ha ka jylla.

Haba kren sha ki lad pathai khubor hadien ka jingleit jurip ia katei ka College ha Mawlai ha ka 7 tarik mynta u bnai, u Sangma u la ong, “Ka jingtei ia ka building la lah ban pyndep baroh bad ka jingpynkhreh ka dang iaid na ka bynta ban lah ban pyntreikam noh kloi katba lah. ka.”

“Hynrei namar ki katto katne ki jingpeit bniah na ka AICTE, ngim pat lah ban pyntreikam noh mardor. Ka jingpeit bniah naka AICTE ka long ba ki dei ban don la ka jong ka administrative building. Namarkata, ngi dang pynkhreh ban shna ia kine ki administrative building la ka jong. Ngi kyrmen ba yn lah ban pyntreikam kham kloi ia kane ka Engineering College,” u la bynrap.

Une u Myntri ula ong ruh ba ka Sorkar ka khmih lynti ban lah ban sdang shuwa ia ki katto katne ki course ha kane ka Shillong Engineering College ha kane ka samoi pule ka ban wan. Ka College kan don haduh 5 tylli ki tnat, kata ka Civil Engineering, Mining, Mechanical, Electrical bad Computer Sciences.

“Kane kan dei ka Engineering College kaba nyngkong eh ha Jylla bad ngi dang pynbiang lut ia ki jingdonkam baroh bad mynta ngin sa thung ruh kham kloi ia ki nonghikai bad ki nongtrei. Hynrei kine ki sienjam baroh kin iaid katkum ka jingbuh kyndon jong ka AICTE” ong une u Myntri.