Yn pyntreikam pura ka KHADC ia ka Market Regulation Act ban iada ia ki nongrep

Syllad | The Rising MeghalayaAugust 18, 2023

Ka EM ka KHADC kaba dei khmih ia ka iew ka hat, ka Kong  Grace Mary Kharpuri mynta ka sngi Palei ka la ong ba ka District Council ka la shim ia ka rai ban pyntreikam pura ia ka Khasi Hills Autonomous District (Establishment, Management and Control of Markets) (Second Amendment) Regulation, Act 2021, kaba thmu ban aijingiada bad kyntiew ia ki paid nongrep hapoh ka thain.

Haba kren sha ki lad pathai khubor ka Kong Grace ka la ong; “Ka dei ka kamram ka jong ngi ban ithuh bad ban pyntreikam mardor ia kane ka Act.Kane ka Act kan treikam pura ha baroh ki jaka kiba hap hapoh ka jingpeit jingkhmih jong ka District Council.”

Da kaba shim ba ka jingpyntreikam ia kane ka Act kan long ka jingkyrkhuh kaba khraw na ka bynta ki paid nongrep, ka Kong Kharpura ka la ong ba kan phaikhmat ruh halor kiba bun ki jingeh kiba ki nongrep ki iakynduh, kata kaba kynthup halor ka jingot jingthew ia ki mar rep bad ruh kan shimkhia ruh kumjuh ha kaba iadei bad ki nongri jingri.

Nalor kata ka pyntip ruh ba ka executive committee kan shim ruh ia ka rai ha kaba iadei bad ki dor ki mur ki ban long ka jingkyrkhu kaba khraw na ka bynta ki paid nongrep.

Ka Act la mynjur ne pass da ka KHADC ha ka 2 tarik u Lber 2021 ka la ioh ruh ia ka jingmynjur na u Lat ka jylla ha ka 26 tarik u Naitung 2023.Ka jingthmu ba kongsan jong kane ka Act ka long ban kyntiew ban plielad ha kaba iadei bad ka jingpyniaid iew ia ki mar rep bad ki jingri bad ban pyntreikam ia ka ha ka rukom kaba khuid.

Halor kane ka bynta yn thaw ruh ia ka Agriculture Produce and Livestock Marketing Facilitation Sub-Committee (APLMFSC) khnang ban pynthikna halor ki hok ban pynioh sha ki nongrep ha kaba iadei bad ka jingpyniaid iew ia ki mar rep bad ki jingri ki jong ki.

Nalor kata ka sub-committee kan shim ia ki sienjam ban khanglad ha kaba iadei bad ka jingthied bad ka jingdie ia ki mar ha ka dor kaba rit ia kaba la buh beit ryntih da ka District Council na ka por sha ka por.Nalor kata kan ai ruh ka jingkyrshan bad pynbiang ia ki iew ki hat na ka bynta ban pyniaid ia ki mar rep kumjuh ia ki jingri jong ki paid nongrep.