Yn pyrkhing iaid kali ha ki thain Polo namar ka jingialang ki Nongsynshar Shnong

Syllad | The Rising MeghalayaJanuary 17, 2025

Namar ka jingialang bah jong baroh ki Nongsynshar Shnong ba la khot pynlong da ka Khasi Hills Autonomous District Council (KHADC) ka ban long ha ka 18 tarik Kyllalyngkot ha madan Polo 2nd Ground, Shillong, kumta na ka liang ka Tnad pulit ka Jylla ka la pynbeit ia ka rukom iaid kali khnang ba kan ym don jingktah ha ka leit ka wan.

U Superintendent of Police ka East Khasi Hills, u Bah Vivek Syiem u pyntip ba katkum kane ka jingpynbeit, yn ym shah ban rung kali na Lumjingshai sha lad CRPF. Kumjuh la khang ia ki kali ba kin iaid na Lumjingshai sha Forest Colony. Hynrei yn pyniaid ia ki kali na lad Lawmali – Polo ter ter.

Ki briew kiba wan sha kane ka jingialang ki lah ban pynieng ia ki kali jong ki hapoh SRGT Parking Lot (kata kat kiba kloi). Ki lah ruh ban ieng sha shiliang ka surok na Tiara Restaurant Jn. – CM Office Connect, shiliang ka surok ka thain Golflink bad marpyrshah ka Software Technology Park, FCI, Lumjingshai. Hynrei, watla katta ia ki kali kiba donkam kyrkieh yn shah ba kin iaid lyngba.