Yn pyrkhing ki bor District ka WJH ban ym don ka jingsam pisa ban khring vote

Syllad | The Rising MeghalayaFebruary 19, 2025

U District Magistrate West Jaintia Hills u la pynthikna ban pyrkhing ia ka jingpahara hapoh ka District khnang ban pynthikna ba kin ym don kino kino ki jingleh ia ki kam kiba pynkhein ain, kata kum ka jingsam pisa, ki jingai sngewbha, jingsam kyiad bad kiwei kiwei khnang ban pynngop bad khring ia ki nongthep vote na ka bynta ki jingioh nong sain pyrthei ha kane ka elekshon sha ka JHADC.

Ia kane u DM u la pyntip ha ka hukum ba la pynmih na ka bynta ban pynjari ia ka kyndon 163 BNSS hapoh ka District na ka bynta saw phew phra kynta naduh ka por 4:00 janmiet jong ka 19 tarik Rymphang.

Kane ka hukum ka khang pyrshah ruh ia ka jingialum lang ne ka leit ka wan jong palat san ngut, ban pynlong ne leit iashim bynta, ban pyniasoh ne ban kren ha kino kino ki jingialang paidbah ne jingiaid paidbah kiba iadei bad ka elekshon. Nalor kata la khang pyrshah ruh ban pyndonkam ia ki tynghung pynsawa na ka bynta kino kino ki kam kiba iadei bad ka elekshon ha kine ki 48 kynta ba la kdew.

Nalor kata la bthah ruh ia ki nongtrei jong ki seng sain pyrthei/nongtrei party/ki nongialap elekshon bad kiwei kiwei ia kiba la wanrah na shabar jong ka constituency bad ki bym dei ki nongthep vote jong ka constituency la bthah ba kin mih noh na ka constituency namar ka jingbteng jong ka jingdon ka jong ki hadien ba la kut ki jingialap elekshon ka lah ban pynthut ha kaba iadei bad ka jingpynlong ia ka elekshon kaba iaid beit iaid ryntih.

La khang pyrshah ruh ia ki briew kiba na bar bad kin sah hapoh ki iingsher dara ne tents/camp/community hall bad kiwei pat. Hynrei ia kane ka jingkhang pyrshah ym lah ban pynbor ha kaba iadei bad ki nongkitkam jong kano kano ka seng sain pyrthei kiba dei ki nongkhmih ia ka district.

Nalor kata baroh ki exit polls/opinion polls bad ki jingpynmih, jingpynbna paidbah ne jingpynphriang ia kum kine ki jingkynthoh la ha kano kano ka rukom, ha ki print ne electronic media kynthup ia ki rynsan social media la khang pyrshah hapdeng jong kane ka por ba la kdew.