Yn rakhe ïaka jingdap 25 snem ka jingshakri ka Sister Philisita Toppo

Syllad | The Rising MeghalayaSeptember 21, 2019

JOWAI: Ki Missionary Sister Mary Help of Christian (MSMHC) Mooralong Convent Jowai, kin rakhe ia ka Silver Jubilee ka jinglong riewniam jong ka Sister Philisita Toppo ha Mooralong Convent Jowai ha kane ka 28 tarik une u bnai Nailur.

Ia ka Sister Phelisita Toppo la kha ha ka 23 tarik November 1965. Ka dei ka khun jong u Laurence Toppo bad ka Anna Miriam Lakra. Ki don 7 ngut shipara, saw ngut ki shynrang bad laingut ki kynthei. Ka Sister Philisita ka dei kaba ar na ki hynniew ngut shipara.

Ki kmie ki Kpa ki la phah skul ia ka naduh dangrit ha St Joseph Secondary School Hamirpur Sundergarh District Orisa (Odisha ba mynta). Hadien ba ka la dep ia ka jingpule Secondary School, la phah ia ka sha Tinsukia Assam. Ka la shim ia ka jingsmai riewniam kaba nyngkong eh jong ka kalong ha ka 8 tarik Nohprah 1994 ha Tinsukia Assam bad ia ka jingsmai riewniam kaba khatduh ban long riewniam shi jingim ha ka 8 tarik Nohprah 2000 ha Little Flower Convent Hatigoan Guwahati.

Hadien ka jingsmai riewniam kaba khatduh ban long riewniam shijingim ka la wan trei ha Little Flower Malki Shillong ha ka snem 1997 bad sha Rlum Jaintia ha ka snem ha ka snem 2011 bad sah haduh mynta ha St. Theresa Convent Mooralong Jowai bad yn sa rakhe ia ka Silver Jubilee ka jingdap 25 snem ka jinglong riewniam jong ka ha kane ka 28 tarik mynta u bnai, ha Mooralong Convent Jowai.

Ha shwa ka jinglehburom ia ka Sister Philisita Toppo da ki khynnah Convent bad ki khynnah skul ka Tome Memorial Secondary School Mooralong, ka skul kaba pyniaid da ki Sister, Missionary Sisters Mary Help of Christians, yn don ka jingknia Mass Iukharist ha ka por 10 baje iengsngi ka ban pynmynta da u Phadar Hilarius Lamare, Vicar General ka Jowai Diocese.