Yn rakhe ka APSTA ia ka lyngkhuh sngi iap ba 175 u Thomas Jones

Syllad | The Rising MeghalayaSeptember 11, 2024

Ka Seng ki nonghikai skul Primary ka All Primary School Teachers’ Association (APSTA) mynta u snem ruh kan bteng ban rakhe ia ka lyngkhuh sngi iap ba 175 snem jong u Sahep Thomas Jones I, ia uba la tip bad pynsah nam kum “U Kpa ki dak thoh bad Pule Khasi.”

Ka seng ha u kyrwoh lyngba u Bah FC Shullai, general secretary ka pyntip ba ha kane ka jingrakhe yn kynthup lang ruh ia ka lyngkhuh snem ba 182 ka jingsdang ia ki skul Lower Primary ha kine ki lum Khasi bad Jaintia. Ki skul Primary ba nyngkong eh ki long ka Mawsmai, Sohratwa abd Mawmluh.

Ia kane ka jingrakhe yn pynlong ha ka 16 tarik Nailur ha Thomas Jones School of Mission, Saitsohpen, Sohra naduh ka por 11 baje mynstep.

Kum ka dak ban pynsah jingkynmaw ia kane ka sngi, kata ha ka 16 tarik mynta u bnai, ka APSTA kan noh synniang ruh sha ka Wisdom Centre Umdihar, Ri Bhoi District T.25,000, sha ka Sanjo Mount Mercy Home Sister’s of Destitutes Sohra T.50,000, sha ka Borsing Children’s Home Mawsmai T. 50,000 bad sha ka Thomas Jones School of Mission T.50,000.

Ka Seng ka pyntip ba ha kane ka sngi yn ia don lang ruh u Rangbah Balajied Kupar Synrem MLA ka Shella bad Chairman ka Meghalaya State Law Commission kum u Kongsan bad u Bah Gavin M Mylliem MLA ka Sohra bad Advisor ka Tnad Health & Family Welfare ka Sorkar Jylla kum u Symbud Kongsan.

Ha kajuh ka por ka seng ka khot ka wer sngewbha ia baroh khamtam ki nonghikai skul Lower Primary kiba la trei shitom na ka bynta ka APSTA.