Yn rakhe ka NESO da ka ‘Black Day’ ha North East ban pyrshah ia ka CAA

Syllad | The Rising MeghalayaDecember 9, 2023

Ka North East Students’ Organisation (NESO) kan rakhe da ka “Black Day’ ne ka “Sngi ba Dum” ha baroh 7 tylli ki Jylla ka thain Shatei Lammihngi (North East) ha ka 11 tarik mynta u bnai kum ka dak ban pynpaw pyrshah ia ka  Citizenship (Amendment) Act, 2019, kaba dei ka jingleh bym hok pyrshah ia ki paid riewlum jong ka thain.

U Chairman ka NESO u Bah Samuel B Jyrwa ha u kyrwoh bala pyllait haka sngi Thohdieng ula ong ba ka Seng ka kwah ban pynkynmaw sha baroh ki paidbah jong ka thain North East ba ha ka 11 tarik u Nohprah, 2019, wat hapdeng ka jingpyrshah ba khlem sangeh jong ki nongshong shnong kiba dei ki trai shnong riewlum ka thain North East ia ka Citizenship (Amendment) Bill, 2019, hynrei ka Sorkar India kam shym la pynsngap bad khatduh lyngba ka Rajya Sabha kala mynjur ia kane ka Ain Iakjakor bala tip kum ka Citizenship (Amendment) Act, 2019.

Na ka liang ka NESO kala pynbna ba ka 11 tarik u Nohprah kan dei ka sngi ka ban kynmaw kum ka sngi kaba ‘Dum’ (Black Day) ia ka thain North East baroh kawei.

Kumta u Bah Jyrwa u la ong ba kum ka jingbteng ban rakhe ia kane ka Sngi ba ‘Dum’  ka NESO kala rai ban pynlong da ka jingwah ia ki lama iong bad ki banar iong ha kiba bun ki jaka ba kongsan ha baroh ki hynniew tylli ki Jylla ha ka 11 tarik mynta u bnai.

“Kane ka jingrakhe ia kane ka sngi ba ‘Dum’ ka long ka khubor sha ka Sorkar India ba ngi pyrshah ia ka Citizenship (Amendment) Act, 2019 bad ha kajuh ka por ban pynkynmaw ia ki paidbah ka thain halor ka jingleh bym hok jong ka Sorkar India pyrshah ia ki trai Jylla jong ka thain North East” ong shuh shuh u Bah Jyrwa.

Shuh shuh u Bah Samuel Jyrwa ula ong ba ka NESO ka khot ka wer sngewbha ia baroh ki paidbah ka thain ba kin kyrshan ia kane ka lynti bala shim bad ha kajuh ka por ban bteng ban ieng iakhun kaba iaka hok la ai da u Blei.