Yn sa pyllait paidbah iaka ka kot “Ka Thup Spah ki Poetry Khasi”

Syllad | The Rising MeghalayaOctober 30, 2020

Ka Sohra ka dei ka shnong kaba la pynmih ia bun ngut ki khraw jabieng, ki nongthohkot, ki nongthoh poitri bad ki myllung ba pawnam kiba kynthup ia u myllung Soso Tham kiba la noh synñiang shi katdei eh sha ka thoh ka tar Khasi naduh hyndai hynthai.

Kum ka jingnoh bynta ha ka thoh ka tar Khasi bad ban pyniar ia ka thoh poitri, u wei pat u khraw pyrkhat na Sohra, u Bah Wanstep Diengdoh un sa pyllait paidbah ia ka kot jong u kaba la ai kyrteng “Ka Thup Spah ki Poetry Khasi”.

Ia kane ka kot poitri kaba la thoh da u Bah Wanstep Diengdoh yn sa pyllait paidbah da u Chief Executive Member ka Khasi Hills Autonomous District Council u Bah Titos Chyne ha ka 2 tarik Naiwieng, 2020 (Sngi Nyngkong) ha ka por saw baje janmiet ha conference hall jong ka KHADC.

Ha kane ka thup poitri la thep la song ia ki snap u ñi u kong, ka mei mariang, ki jingialehkai khynnah rit, ka burom ka nam jong ka Sohra, ki matti bad dienjat u men barim, bad ruh shaphang ka mynnor, mynta bad lashai.

U Bah Wanstep Diengdoh u dei u nongseng bad principal jong ka Sohra Academy Secondary School. La pun, la kha bad pynheh pynsan ia u ha Sohra. U dei ruh u samla rangbah uba la paw ha ka kam saiñdur ia ka pule puthi ha Sohra kum u nonghikai.