Yn sakhi ka Jylla ia ka ioh ka kot ba 10 Bn dollar: Paul Lyngdoh

Syllad | The Rising MeghalayaMarch 7, 2024

U nongialam ka UDP uba dei ruh u Myntri ka sorkar Jylla u Bah Paul Lyngdoh ha ka 6 tarik mynta u bnai u la ong ba ka jingtreikam jong ka sorkar MDA-2 ka la long kaba seisoh bad ka jylla kan sakhi ia ka ioh ka kot ka ban kynjoh sha ka 10-billion-dollar haba kut ka samoi kane ka sorkar.

Haba pynpaw halor ka jingwanrah ba dang shen ia ka mang tyngka da u Myntri Rangbah ka Jylla u Conrad K Sangma, u Bah Paul u la ong, “Ngi don ia ka jingangnud ban pyniaid shakhmat ia ki jingtreikam bad ha kaba kut ka samoi jong kane ka sorkar, ka Meghalaya kan kynjoh sha ka thong kaba 10 billion dollar ha ka ioh ka kot.”

“Ka EM Elevate program ka la pynpaw ia ka jingjop kaba khraw ha kane ka bynta. Ka Tnat Arts and Culture ia kaba la ju shim kum ka Tnat kaba rit mynta ka kynti ka la lah ban pynieng ia u motdur jong u Syiem Tirot Sing hapoh ka Library ha ka nongbah Dhaka ha Bangladesh bad ia ka Tagore Cultural Complex ha kane ka nongbah Shillong nalor kiba bun kiwei pat ki jingtreikam,” u la ong.

Nalor kata u la ong ruh, “Ka Tnat Toursim mynta ka la kiew shaphrang. Ngi don ia ka MGLP kaba pynlong ia ki show bad kaba iadon bynta lang bad haduh kumba 3000 ngut ki samla, ngi don haduh kumba 15000 ngut ki briew kiba ioh kam ioh jam bad kamai kajih lyngba ka Tourism ha kiba bun rukom. Kumta kine ki dei ki jingiaid lynti ba kongsan bad tang hapoh shi snem na ka bynta kine ba kin wan jia ka dei da shisha ban ioh pdiang ia ka jingiaroh,” ong shuh shuh u Bah Paul.