Yn sangeh noh ka JHADC ban bret ñiut ha Mynkjai, syllang ki nong Jowai

Syllad | The Rising MeghalayaMarch 24, 2021

U CEM jong ka Jaintia Hills Autonomous District Council (JHADC) u Ma Thombor Shiwat ula khot ïaki dkhot ka KSU War Jaintia bad ki nongïalam shnong jong ka Moopyut ban ïakren haba ïadei bad ka jaka theh ñiut kaba don ha Mynkjai, West Jaintia Hills District haka sngi Balang.

Kane ka jingkhot iakren u CEM ia ka KSU ka dei hadein ba kila mih paidbah haka 19 tarik une u bnai ban khang ia ki kali theh ñiut ka JHADC bad ka Jowai Municipal Board ban bret ñiut ha Mynkjai.

Ki dkhot jong ka KSU bad ki nongïalam shnong Moopyut haka jingïakynduh bad u CEM ki la pynsngew ïaki jingktah jong katei ka jaka bret ñiut ïaki shnong marjan kumjuh ki nongleit ki nongwan lyngba ka surok bah na Jowai sha Amlarem.

Kila pynsngew ba ka jingbret pathar ïaki jaboh jabaiñ ba mih na man ki thliew ïing ka buh jingma ïaka koit ka khiah jong ki briew namar ka jingsma ki jaboh jabaiñ ba mih na katei ka jaka bret ñiut.

Na ka liang u Ma Thombor Shiwat ruh ula kular ban sangeh noh ka jingbret ñuit sha Mynkjai bad un sa shong pyrkhat sani bha ban wad ki jaka kiba biang ban bret ïaki jaboh jabaiñ haki jaka kiba biang. Nalorkata la kynnoh ba dei ka Municipal kaba leh ïa kine ki kam namar dei ma ka, ba bret bun ki jaboh ha katei ka jaka.

U President ka KSU War Jaiñtia Circle u Laitphar Syngkrem ula ong, ka KSU ka ïeng haka nongrim ban pyrshah ïa katei ka jaka bret ñiut ha Mynkjai namar ba ki bret pathar sha ba palat ïa ki ñiut bad ki jaboh jabaiñ.

Sangeh pynlang ñiut ka Jowai Municipal Board na sor Jowai, mih pyrshah ka KSU ba lehsih ha Mynkjai

“Ka jingktah ïaki shnong ba don marjan bad ka jaka theh ñuit ka long shaba palat, ki skaiñ ki wan rung shapoh ki ïing ki sem bad boi sha ki jingbam jingdih bad kane ka ktah ïaka koit ka khiah khamtam ki khyllung khynnah kiba dang tlot bor ym tang kata ka ktah ruh ïaka jingitynnad jong ka mariang bad ki sawdong sawkun,” la ong u Laitphar.

Kane ka jingpyrshah jong ka KSU kala pynlong iaka JMB ban pynmih da ka notice ban pyntip paidbah ba kan sangeh ban lum ban lang ia baroh ki ñiut kiba mih na Jowai kynthup na ki iew ki hat naduh 20 tarik Lber 2021 tad haduh bala pynbna da kumwei.

Mynta ki nongshong shnong ka Jowai kila syllang namar ba kim ioh jaka ban bret ñiut bad ki ïing ki sem jong ki kila sdang dap ki ñiut kiba la pyllang ha kine saw san sngi.