Yn sdang iaka quarter final MYL bad ka MSL naduh 26 tarik Risaw: MFA

Syllad | The Rising MeghalayaSeptember 19, 2024

Ka Meghalaya Football Association (MFA) haka 18 tarik Nailur ka la pynlong ia ka executive committee ban shim ia ki katto katne tylli ki rai kiba iadei bad ki lympung ialehkai kiba la pynlong bad ia kiba yn dang pynlong kumjuh.

Na ka liang u Secretary ka MFA u bah Suinesh Syiem haba kren sha ki lad pathai khubor u pyntip ba ha ka wat kaba nyngkong Meghalaya Youth League kan kut ha ka 28 tarik mynta u bnai.

Ha kane ka jingialang la iakren ban pynskhem pat ia ki tarik ban pynlong ia ki quarterfinal ba la buh ban pynlong naduh ka 5 bad ha ka 7 tarik jong u bnai Risaw u ban wan. Katba ki semifinals la buh ba kin long ha ka 9 tarik katba ka phainal ha ka 11 tarik u Risaw 2024.

U la pyntip ruh ba ia kine ki jingiakhun baroh yn  pynlong ha MFA Third Ground Polo bad ha SAI Stadium katba ia ka phainal pat la buh ban pynlong ha SSA Stadium First Ground Polo.

Katba ha kaba iadei bad ka lympung ialehkai Meghalaya State League, u bah Sunesh u pyntip ba kan ka jingialang   ka la shim ia ka rai ban sdang noh ha ka 26 tarik jong u bnai Risaw u ban wan.

La rai ruh ban pynlong ia kane ka lympung ha ki 6 tylli ki jaka ha kaba yn phiah ia ki team ha ki 6 tylli ki group ban don mar saw tylli ki team ha kawei ka group, ha kaba ki klob ialehkai ka Shillong Premier League ka Shillong sports Association kin ioh ban ia shim bynta lai tylli ha kane ka lympung katta ka Rangdajied United FC kaba bat ruh kum ka lahduh ka MSL ha ka snem kaba la dep, ka Mawlai SC kaba rah ia ka nam lahduh jong ka SPL bad sa kawei pat kan dei ka Shillong Lajong FC.

Haba jubab ia ka jingkylli halor ka jingbym ioh lad mynta ka snem da ki club ialehkai ka jylla ha ka lympung jong ka AIFF, u bah Sunesh u pynpaw  ba ka MSL ka dei ka lympung ialehkai kaba la heh bha bad kaba donkam bha ia ka jingiarap na ka liang jong ka sorkar  bad lymda ioh ia ka lad jingiarap na ka sorkar ka buh jingeh ia ka MFA ban pynlong ia ka MSL.

Kumta ruh u la ong ba dei  halor kane ka nongrim ba mynta ka smoi ialehkai na kane ka jylla ym shym la don satia ki club ki ban ioh ban iashim bynta sha ki lympung ialehkai kum ka Third Division I. League ba la pynlong da ka AIFF, ka lympung kaba long u mawjam ia ki ban lah ban kynjoh sha ka thong ban ioh ia aireng shaduh ka lympung I league.