Yn sdang ka MFA ia ka lympung ialehkai phutbol Meghalaya State Youth League

Syllad | The Rising MeghalayaApril 24, 2024

Ka Meghalaya Football Association (MFA), ka la khreh ba kan iaid beit noh shakhmat ban pynlong ia ka lympung ialehkai phutbol ba kyrpang na ka bynta ki khun samla ka jylla, katta ka ‘Meghalaya State Youth League.’

Haba iakren bad ki nongkitkam ka MFA kaba kynthup ia u Secretary u bah Sunesh Syiem, Bah Cliff Nongrum bad Bah Freddy Kharpran kiba dei ki dkhot ka tournament committee, ki pyntip ba ha ka 4 tarik u bnai Jymmang u ban wan, ka kynhun jong ka MFA kin leit ban don bynta ha ka jingjurip ia ka rta kaba thikna (screening) jong ki samla ki ban mihkhmat ia la ki district sha kane ka lympung ialehkai.

Kane ka jingjurip bniah ia ka rta jong ki khynnah ka U-14 bad ka U-16 ka ban long ha ki saw jaka kum ha Shillong, Tura, Mairang bad Jowai, kaba mut ba ki team ba dei na East Khasi Hills ka screening kan long ha Shillong, West Khasi Hills ha Mairang, Jaintia Hills ha Jowai bad Garo Hills kan dei ha Tura.

Ki la ong ruh ba kane ka lympung ka dei ka inter district ha kaba ka jingpynialehkai kan long ha ka home bad away, bad ha kane ka lympung ki kynhun ne team baroh ki ban la  antad ban iashim bynta kin ym duna ia ka 21 tylli, hynrei ka jingiashim bynta kaba pura kan shong hadien bala dep ban jurip ia ka rta jong ki khynnah ha ka 4 tarik u bnai Jymmang u ban wan.