Yn sdang ka Science & Commerce College ha Mawphlang bad Mahendraganj: CM Conrad

Syllad | The Rising MeghalayaMarch 12, 2025

U Myntri Rangbah ka Jylla u Conrad K Sangma ha ka 11 tarik Lber u la ong ba ka samoi shim klas jong ki artylli ki Science and Commerce College ha Mawphlang bad Mahendraganj kin hap ban sdang noh khang ba kan ym long ka jingduh nong ia ki samla pule.

“Ngi tip bha ba ka jingpyndep ia ki jingtei kan dang kham shim por, hynrei ngi sngew ba ngi dei ban sdang noh ia ka samoi shim klas jong kine ki artylli ki college khnang ba ki samla pule kin ym duh nong..Kat haba lait ki jaka jong ki jingtei ngin sdang ia ka jingshim klas,” ong u CM haba jubab ha ka iingdorbar ha ka kynta buh jingkylli.

Nalor kata u la kular ruh ban pynthikna ba ki kontraktor ki dei ban pyndep noh kham kloi ia ki jingtei jong kine ki jaka pule.

Hashwa kane haba wanrah ia ka kaiphod jong ka jinglong jingman jong ka Science and Commerce College Mawphlang, u Myntri ka Tnad pule puthi u Rakkam A Sangma u pyntip ba ka jingiaid shakhmat jong baroh ki jingtei ki la dep haduh 86 percent bad ka jingiaid ha ki jingpynlut pynsep ka la kot sha ka 94 percent. Ka por ba la buh thymmai ban pyndep ia ka project ka long hapoh u bnai Lber 2026.

U la ong ruh ba ka sorkar ka la phah na ka bynta ban ioh ia ka jingmynjur na ka bynta ban pynkha ia ki 46 tylli ki kam da kaba bynrap ba ka jingpynkhreh ia ka plan bad ka jingmang tyngka ha kaba iadei bad ka bording elektrik kiba shabar, ka jingring um bad ka jingsiang ia ka surok kaba lam sha ka college ka dang iaid shakhmat.

Ha kaba iadei bad ka Science and Commerce College Bahsapara (Mahendraganj), u Myntri u la ong ba ka jingpyndep ia ka jingtei ka la kot sha ka 66% bad ki jingpynlut pynsep sha ka 70 percent. Ka jingpynbeit thymmai ban pyndep ia ka project ka long hapoh ka 31 tarik u Lber 2026.

U la pyntip ba ka sorkar ka la phah ban ioh ia ka jingmynjur na ka bynta ban pynkha ia ki 46 tylli ki kam bad bynrap ba ka jingpynkhreh ia ka plan bad ka mang tyngka na ka bynta ka lain bording kaba shabar, ka jingring um kaba shabar bad ka surok ka ban lam sha ka college ruh ka la iaid shakhmat.

Nalor kata u Myntri u la ong ba ka pisa baroh ba la mang da ka sorkar India na ka bynta ka project Science & Commerce College ha Mawphlang ka long T.36.55 klur ia kaba la mang ha ka 30 tarik Jylliew 2017, bad ka bhah ka long da 90:10 ha kaba haduh T.31.1685 la dep ban pyllait.

Baroh ka pisa ba la mang da ka Sorkar India na ka bynta ka Science & Commerce College Bahsapara (Mahendraganj) ka long T.36.31 klur, kata ha 30 tarik Jylliew 2017 ha kaba ka bhah ka long da 90:10, ha kaba T.23.5274 klur la dep ban pyllait.