Yn sdang noh ka jingai tika IMI 5.0 iaki khunlung khynnah bad longkmie ba ar met

Syllad | The Rising MeghalayaAugust 4, 2023

Ka tnat ka koit ka khiah ka sorkar jylla ryngkat ka jingiatreilang bad ka Momentum Routine Immunization Transformation and Equity Project ka la pynlong ia ka jingialang pynshai paidbah ban sdang biang iaka Intensified Mission Indradhanush (IMI) 5.0 campaign bad ban banjur halor ka jingdonkam ban ai tika ia ki khunlung khynnah kiba la dei ban ioh tika khnang ba kan iarap ban pynkhlain ia ka bor met jong ki ha kine ki sngi ba bun ki jingeh.

Kane ka IMI 5.0 ha Jylla kan sdang naduh Nailar (August) 7-12, Nailur (September) 11-16, bad Risaw (October) 9-14.

Ha kane ka prokram la wan iashim bynta lang da u Ramkumar S, IAS Mission Director NHM bad U Dr Pradeep Haldar, Senior Strategic Advisor, John Snow India (JSI). Ka jingialang ka la ban jur halor ka jingkongsan jong ka jingai tika ia ki khunlung khynnah kiba la lah ban shim ia ki tika na ka bynta ban pynkhlain ia ka bor met ban iada na ki jingpang ba har rukom kiba hapoh ka IMI.

Ha kane ka lympung la sakhi ia ka jingiashim bynta jong ki riew pawkhmat na ki lad pathaikhubor, ki nongtrei ka koit ka khiah, bad ki riewpawkhmat na ki shnong ki thaw, bad baroh ki la ai ka jingkyrshan na ka bynta ban pynlong ia ka Intensified Mission Indradhanush 5.0 kaba jop.

Ka IMI 5.0 ka phaikhmat sha ki bynta kiba duna ka jingai tika khamtam na ka bynta kito ki briew kiba khang ban ai tika, bad ka jingthmu ka long ban ai tika na ka bynta ki khunlung khynnah bad ki longkmie kiba armet kiba lah ban shim tika hynrei kiba la shah kyntait noh na ka jingioh tika katkum ba dei ban ioh na ka por sha ka por ne ka Routine Immunization.

Ka jylla ka la pynlong ia ka jingai jinghikai kaba paka bha ha ki kyrdan bapher bapher, da kaba ban halor ka jingdonkam ban leit khnang sha kito ki briew ki bym pat shym la ioh ia ka tika bad kito ki bym pat ioh pura ia ka tika bad ban kynthup ia ki ha ka programme ai tika. Ka IMI 5.0 ka buh kyrpang hakhmat eh ia ki khunlung kiba na ka 0 haduh 5 snem rta ki bym pat ioh ia kino kino ki tika, da ka jingthmu ban ai tika ia kine ki khunlung kiba la dei ban ioh tika bad ai ia ki ia ka tika ban iada ia ka jingim jong ki.      

Nalor kane, kane ka sienjam ka pynpaw ruh ia ka jingtreikam bad ka jingiaid shaphrang ha ka jingpyrshang ban pynduhjait noh ia u khniang jingpang Measles bad Rubella, da kaba pyntikna ba man la I khyllung iba hapoh 5 snem idei ban ioh ia ki 2 tylli ki dose ba donkam na ka bynta ban shim ia ka tika Measles and Rubella Containing Vaccine (MRCV) nalor kiwei ki jingpang.

U Ramkumar S, IAS Mission Director NHM u ong, “Ka IMI 5.0 ka pynpaw ia ka jingtrei ba radbah jong ka na ka bynta ban kner ia ki jingshakri sha kito ki bym pat shim la ioh ia ki tika, bad kane ka iarap ban wanrah ka jingduna ha ka jingbym ioh tika, bad pyntikan ba ka lawei ki khunlung khynnah kan long kaba koit ba khiah. Ngin trei radbah na ka bynta ban pyntikna ba man la I khunlung bad khynnah kiba la dei ban ioh ia ki tika kin ioh ia ki na ka bynta ban wanrah ia ka jingbiang jingbit jong ka jingim jong ki, bad ha ka juh ka por ban pynkhlain ruh ia ka bor met jong ki khunlung khynnah ha baroh ki thain jong ngi. Ryngkat ka jingiatreilang bad kane ka shnat bapeit na ka bynta ka jingai tika, ka jingiatreilang jong ki kynhun na ka koit ka khiah, bad da ka jingkyrshan lang jong ka shnong ka thaw, ngi la long kiba la thikna ba ngin lah ban wanrah ka jingkylla ha ka liang ka koit ka khiah bad ka jingbiang jingbit jong ki khyllung khynnah bad pynlong ruh ia ka jylla Meghalaya kaba khlain bad kumjuh kaba koit ba khiah.”

Shuh shuh ka tnad ka koit ka khiah kala pynbna ruh ba kala sdang iaka digital platform kaba la tip kum ka U-WIN ban iarap iaki nongtrei ka tnad ka koit ka khiah ban buddien bad ban pynthikna ba ki khynnah bad ki longkmie ba armet kin ioh iaka tika.

Ka thong hi ka long ban pynioh haduh 95% ka jingai tika kat haduh u bnai Nohprah 2023, ia kaba mynta ka long kumba 89% ka jinglah ban pyndep ia ka jingai tiket ha ka jylla Meghalaya

Ha kajuh ka por na kaliang ka tnad ka koit ka khiah ha West Jaintia Hills kala pynbna ba kane ka jingai tika kan sdang naduh 7 tarik mynta u bnai Nailar bad kan kut haduh u 14 tarik u bnai Risaw.

Ki doctor kila kyntu iaki longkmie ban shim iaka kabu ban ai tika iaki khun jong kiba hapoh san snem ka rta bad ki longkmie ba armet ban shim ia kane ka tika ban pynkhlain iaka bor met da kaba leit ha ki jaka sumar ba jan tam.