Yn sdang noh ka jingpule doktor MBBS ha PA Sangma International Medical College

Syllad | The Rising MeghalayaOctober 7, 2024

Ka PA Sangma International Medical College (PIMC), kaba dei ka jingiatreilang hapdeng ka University of Science and Technology Meghalaya (USTM) bad ka Sorkar Meghalaya ka la pynkhreh ban sdang noh ia ka jingpule kaba nyngkong jong ka lyngba ka jingialang ba la tip kum ka ‘White Coat’ ceremony ha ka 8 tarik u Naiwieng 2024, kane kalong katkum u Chancellor ka USTM u Mahbubul Hoque.

Ka National Medical Commission (NMC) ka la ioh ia ka jingmynjur ban pdiang 150 tylli ki seat MBBS na ka bynta kane ka college.

Katkum ka por ba la buh ban pdiang, ka tarik ba khatduh ban pynpoi ia ki jingdonkam baroh kan long ha ka 13 tarik u Risaw, bud da ka jingpynbna ha ka kylla kaba nyngkong ia ka merit list ha ka 14 tarik Risaw. Ka jingiasyllok na ka bynta ka jingpdiang kan long ha ka 14-16 tarik u Risaw, ha kaba ia ka merit list kaba ar yn pynbna ha ka 20 tarik u Risaw. Ka prokram aijinghikai na ka bynta ki samla pule kiba thymmai kan long ha ka 24 tarik u Risaw bad ka ban lam sha ka jingsdang ba pura ia ka jingpule.

Haba aijingkren ha ka jingialang bad ki lad pathai khubor ha ka 6 tarik u Risaw, u Hoque u la kdew ia ka thong kaba kongsan kaba la ioh pdiang da ka jingplie ia ka PA Sangma International Medical College (PIMC), ka jingiatreilang jong ka USTM bad ka Sorkar Meghalaya.

U Hoque u la pynpaw ka jingsngew sarong halor ka jingkiew jong ka jaka pule da kaba ong, “Kane ka dei ka jingjop ka ban sah jingkynma na ka bynta ka USTM bad u mawjam ba kongsan ha ka jingiaid lynti ka jong ngi ban noh ia u synniang ba don jingmut sha ka liang ka koit ka khiah hapoh ka thain bad ka ri. Nangne shakhmat, ki nongpang bad ki samla pule kim donkam ban leit shabar jong ka thain na ka bynta ka jingshakri ha ka liang ka koit ka khiah.”

U Vice-Chancellor ka USTM u Prof. GD Sharma ha ka jingkren u la pynpaw ia ka jingdonkam jong kane ka kam pynroi, da kaba kdew ba ka jingshim nyngkong jong ka College ia ki 150 ngut ki samla na ka bynta ka jingpule MBBS ka pyni ia ka lynnong kaba thymmai ha ka jingaiti jong ka USTM ban ai ia ka jinghikai kaba paka tam ha ka liang ki lad jingpule kaba iadei bad ka koit ka khiah.

Katba u Principal ka PIMC u Prof. Dr. Biraj Kumar Das u la bynrap ia ka jingkut jingkut kaba kongsan jong ka college halor ki laitylli ki bynta kiba kongsan, kata ka jingpule kaba bha tam ha ka liang ka koit ka khiah, ka jingaijingshakri kaba katkum ka juk ba mynta bad halor ka jaka wad bniah bathymmai. U la bynrap ruh ba kane ka jaka pule ka la thung ia ki riew shemphang ha ka liang ka koit ka khiah na ki bynta bapher bapher jong ka ri ban pynthikna ia ka jinghikai bad ka jingshakri kaba bha tam.

Ka Medical Superintendent ka PIMC ka Dr. Rashna Dass Hazarika ka la pynbna ba ka jingsdang ia ka jingpule ka long ha kaba kut taiew jong u bnai Risaw 2024. Ka la kdew ruh halor ki jingtyrwa kiba paka sha ki samla pule MBBS da ka jingthmu ban khiring ia ki samla ba kwah pule doktor na ki bynta bapher bapher jong ka ri India sha kane ka medical college kaba thymmai.

Na ki baroh ki 150 tylli ki seat MBBS 40 tylli la bhah kyrpang kum ki seat ka sorkar Jylla. Na kine 25 seat yn bud ia ka rukom siew jong ka sorkar katba ia ki 15 tylli kiba sah yn tyrwa mar siteng ka jingsiew na kaba la buh da ka skulbah. Ka PIMC ka thmu ruh ban pynioh ia ka lad jingsumar kaba lah ban kotbor, kata 50% na ka bynta ka jinshakri ba kyrpang sha ki nongpang na Meghalaya bad khlem jingsiew ia ki jaka sumar ba kyllum.