Yn sdang noh ka RUFC ia ka Football School Programme ban iit khynnah ialehkai ha Jylla

Syllad | The Rising MeghalayaAugust 20, 2022

Kum shi bynta ban ioh ban sei lem ia kita ki sap ba rieh ne ban plie lad ia ki khynnah ban ioh ia ka jinghikai ba paka ne kaba da janai bha ha ka liang ka jingialehkai jong ka phutbol, ka Rangdajied United Football Club (RUFC), ka pyntip ba naduh u bnai Nailur u ban wan, kan plie noh ia ka Football School Programme (FSP).

Ka jingplie ia kane ka kam ai jinghikai kan sdang shwa na madan Heh Stadium, Mawlai bad nangne FSP  kan bteng ba kan bteng ba kan iaid pat kylleng sawdong ka jylla.

Haba kren bad kane ka lad pathai khubor shaphang kane ka kam, u bah Eugeneson Lyngdoh MLA Mawphlang Constituency ba dei artad mynta u trai jong ka Rangdajied Utd FC bad ha ka juh ka por ba bat kum u President ka Shillong Sports Association, u la ong ba kaei kaba la pynshon jingmut eh ia u ban shim ia kane ka sien jam ban khreh sdang ia kane ka prokram ai jinghikai, ka long ba ka pynkynmmaw ia u ia kaei kaba kum u khynnah rit um juh ioh u kwah pat ba un pynurlong ia ki khynnah rit kiba mynta.

Nalor katta u la ong ruh ba ha kum kane ka juk kaba mynta ban shu ong ba baroh kin long kita ki player phutbol da lei lei kam lah satia ba kan long, ha kaba u sngew ba kum ki khynnah kin hap ban khreh bad ban sdang ban iaid ia ka lynti, ha kaba hangne lada u khynnah u don shisha ia katta ka sap un lah ban bteng katba u bym don pat ia ka sap un hap ban hun bad ban shu ialehkai myllen noh ialade.

Kumba ka long ia mynta ka jingsdang kumba la dep ban maitphang kan long shwa nangne napoh ka nongbah Shillong bad suki pa suki, yn sa nang bteng ban iaid kylleng sawdong ka jylla.

Shuh shuh lyngba kane ka Football School Programme (FSP) u bah Eugeneson u kwah ruh ban phai khmat ruh de sha ki rang ialehkai barim bad ba la mihkhmat ruh wat ia ka jylla kiba saphriang ne don ha kylleng sawdong jong ka jylla, da kumta kaei ka jingthmu ka jong u bah Eugene ia kum kine ki rang ialehkai ka long ba ma ki ruh kin wan ban iadon bynta lang noh ha kane ka prokram, khnang ba katta ka jingnang jingtip kaba ki la ioh teng ba kin mad ha ka jingim kin lah ban ia sam lem sha ki khynnah ba mynta.