Yn sdang pyntreikam ka Sorkar ia u QR Code ban buddien ia ka jingpyniaid ia ka kyiad

Syllad | The Rising MeghalayaMarch 29, 2025

Ka Tnad Excise ka Jylla ka la pynkhreh ban sdang pyntreikam noh shen ia u QR Code ban buddien ia ka jingiaid jong ki jait kyiad bapher bapher hapoh ka 60 sngi.

“Ngi khmih lynti ba lada ka long ngin sdang pyntreikam noh naduh u bnai Jylliew. Hapoh ka 60 sngi, sngi sdang pyntreikam noh,” ong ka Commissioner ka Tnad Excise ka Kong Matsiewdor War Nongbri haba kren sha ki lad pathai khubor hadien ka jingialang ba la khot pynlong da u Myntri ka Tnad Excise u Bah Kyrmen Shylla ha ka 28 tarik Lber.

Ka la pyntip ruh ba ki ophisar jong ki district kin sa ioh shuh shuh ia ki jinghikai ba bniah halor ki kor treikam kiba iadei bad ka jingbuddien ia ka kyiad IMFL naduh ba la pynmih ia ka tad haduh ka por ba thied da ki nongpyndonkam.

“Man ki ophis, man la ki bottling plant, ki distillery bad ki bonded warehouse bad kiwei kiwei haduh ki dukan retail ne wine store kin don ia kine ki kor buddien. Kumta man la ki QR Code yn hap ban scan bad mar mar yn lah da kaba suk ban buddien shano ka mar ka poi, kata la ka long ba la pynpoi ne em ia ka lane la ka long ba la die ia ka,” ong ka Kong Nongbri da kaba bynrap, “Kane kan iarap shibun bah ia ka Tnad bad nga thikna ba namar ngi lah ban lapdien mardor ia ka mar, ngin lah ban iohi ia ka jingioh lum khajna jong ka Tnad tang shikhyllipmat da kaba shu khniot ia u budam.”

Haba kylli, ka Commissioner ka la ong, “Namar ba ngi la don lypa ia ki kor ki bor ia kaba la dep ban mynjur bad ka kompeni (M/s CMP Enforce System LLP na Delhi) kumta kane kan ym shim por. Ngi la don lypa ia ki ophisar jong ngi haduh ki constable abd kiwei ha ki bonded warehouse bapher bapher na ka bynta ban pyntreikam ia kane.”