Yn sdang sa ka Chief Minister’s Scholarship Scheme ban kyrshan ïa ki khynnah pule Class XI & Class XII 

Syllad | The Rising MeghalayaFebruary 22, 2024

U Myntri Rangbah ka jylla u Conrad K Sangma u la pyntip ba ka sorkar kan sa sdang ïa ka Mission Education 2.0 ha une 2024-25 ban pynbiang ki jingdonkam ba kongsan kum ka bording, ka um-dih kaba khuid, ka jaka leitbar, bad ki miej ki shuki ha baroh ki skul sorkar ba la mang pisa haduh T.100 klur.

Ïa kane u Sangma ula ong haba wanrah ïa ka mang tyngka jong ka jylla haka 21 tarik Rymphang.

U Sangma u la ong ruh ba hapoh ka jingpyntreikam ïa ka Early Childhood Development Mission, ka sorkar ka don jingmut ban kyntiew ïa ki 2,148 tylli ki Anganwadi centre kiba la don lypa bad ban pynïar kane ka shnat treikam da kaba buh ha manla ki shnong vad plie sa 1500 tylli ki centre kiba thymmai sha ki shnong kibym pat lah ban kynthuplang ha kane ka mission. U la ong ba yn thep pisa haduh T. 500 klur tyngka ha kine ki san snem ban wan bad la mang T. 47 klur na ka bynta u snem 2024-25. 

U Myntri Rangbah u la pyntip ruh ba ka sorkar ka la shim ki sienjam ban kyntiew kyrdan iaki 2044 ki skul sorkar happoh ka Mission education ha ka jinglut kaba T.326 klur, katba ka jingshna thymmai bad maramot la lah ban pyndep ha ki 220 tylli ki Secondary bad Higher Secondary School bad ka kam ka dang ïaid shakhmat ha ki 100 tylli ki skul bad sa 1725 tylli pat ki skul ki dang don ha ki bynta bapher bapher jong ka jingshna pynthymmai.

Ha kaba ïadei pat bad ka jingiashimbynta ki samla ha ki shnong ki thaw, ka sorkar ka la mang na ka bynta ka projek ban bun iaki Library na ka bynta ki khynnah bad samla ha ki 750 tylli ki shnong jong ka jylla ka jinglut kaba kot sha ka T.162 klur.

 “Nga pynbna iaka skhim kaba thymmai ban ai jingkyrshan ïa ki khynnah pule higher secondary”, la ong u Sangma ba kane ka Chief Minister’s Scholarship Scheme yn sam ha u snem 2024-25 sha ka ki khynnah kiba dei hok ban ioh haka Klass XI bad XII. U la ong ruh ba ka sorkar kan sa sdang iaka program ba thymmai ban kyntiew ha kaba iadei bad ka bha ka miat ki khynnah pule- ka MPOWER haka jinglut kaba T. 380 klur.

U Myntri Rangbah u la pyntip ba ka sorkar kala mang T. 3,539 klur ban nangpynkhlaiñ halor ki kam ba īadei bad ka pule puthi, kynthup ka pisa kaba kot sha ka T. 1,335 klur kum ka grants-in-aid na ka bynta ka tulop.