Yn sdang tohkit ka kynhun ha ki 7 District ïaki tin sopïing ban pynthikna ba stang ne rben

Syllad | The Rising MeghalayaJuly 2, 2024

Ka kynhun tohkit ba la thung da ka Tnat Housing kan sdang ban pynlong ia ka jingleit jurip bad tohkit bniah ban pynshisha ia ka jinglong jong ki tin sop iing ha ki hynniew tylli ki District ka Rilum Khasi bad Jaintia naduh ka 2 tarik Naitung 2024.

Kane ka la wan long hadien ka jingujor da ka Seng Hynniewtrep Youth Council (HYC) halor ka jingkynnoh sam da ki tin sop iing kiba tad dor bad kiba stang lyngba ka Chief Minister Housing Assistance Programme (CMHAP).

Kane ka kynhun tohkit ba la khlieh da u Joint Secretary incharge Housing department u LC Marak kan pynlong ka jingleit jurip ia ki kudam jong ki Community & Rural Development (C&RD) Block hapoh East Khasi Hills naduh ka 2 haduh ka 9 tarik mynta u bnai, ha West Jaintia Hills ha ka 12 tarik, Ri Bhoi ha ka 13, Eastern West Khasi Hills bad West Khasi Hills ha ka 16, East Jaintia Hills 19 bad ha South West Khasi Hills ha ka 20 tarik Naitung 2024.

Na ka liang u LC Marak ha ka shithi ha ka 28 tarik u Jylliew ba ladep, u la bthah ia baroh ki District Housing Officers (DHO) bad ki Block Development Officers (BDO) ba kin don ha la ki jong ki ophis ha ka sngi ba wan jurip da ka kynhun tohkit khnang ban pynshisha ha kaba iadei bad ka jingkynnoh sam da ki tin sop iing kiba tad dor kumba la kynnoh ba kane ka kynhun Sengbhalang.

Lah ban kdew ba ka jingthied ia kine ki tin sopiing ka dei kaba la shimti da ka Directorate of Housing na ka bynta u snem 2022-23 bad 2023-24 lyngba ka kompeni Hariana Iron Works Pvt. Ltd, Kolkata, West Bengal ha kaba la pynpoi ia kine ki tin sha baroh ki District bad ki BLock hapoh ka Jylla.