Yn shim jingkhein ka sorkar ban buh iaka dor u kwai

Syllad | The Rising MeghalayaFebruary 21, 2024

U Myntri Rangbah ka jylla u Conrad K Sangma haka 20 tarik Rymphang, u la ong ba ka sorkar ka dang shim jingkhein halor ka jingtyrwa ban buh iaka dor ba duna eh u kwai ne ka minimum support price (MSP) ha kaba iadei bad kwai (arecanut).

U Sangma u la ong kumba ka long mynta ka dor jong u kwai ba la saiñ la die haduh shiphew shah ban ia u bym pat khleh (raw) bad ka donkam ban sain pynbha pynkiew dor shuh.

U Myntri Rangbah ula ong ia kane haba jubab iaka jingkylli kaba wanrah da u MLA Amlarem, u Bah Lahkmen Rymbui, ban pyrkhat iaka MSP na ka bynta u kwai bad ula ong ba ka dor jong u kwai ka la hiar arsut kane ka lah wallam ka jinghap ban pynmih bun hynrei duna ka jingïoh na ka bynta ki nongrep.

Ula kdew halor ka jingpynbna ka sorkar India ha u snem 2020 kaba la buh dor T.200 kaktum ka MSP na ka bynta u kwai.

Haba ioh iaka jubab na u Myntri Rangbah, u Rymbui u la kyntu iaka ka sorkar ba kan pyrkhat ban buh ka jaka saiñ ha Amlarem ban kyntiew halor ka jingpynmih bad pynïaidïew ïa u kwai.

Ha kaba ïadei bad kane u Sangma u la pyntip ba artylli na ki 46 tylli ki jaka saiñ la dep buh ha Amlarem. U la ïathuh ba la jan kot sha ka T.41 lak la theh pisa na ka T.1 klur.

Hashuwa kane, na ka liang ka Myntri ba dei khmih ïa ka tnad Agriculture & Farmers’ Welfare ka Kong  Ampareen Lyngdoh ka la ong ba ki don  46 ki jaka saiñ kynthup ki sem treikam, ki kor khuid kwai, ki nala pynrkhiang  bad ki  jaka pdem kiba lah dep shna ha ki 21 tylli ki blok ha ki 10 tylli ki district. Baroh ki shongdor haduh T. 14.06 klur.

Ki don 34 tylli ki unit kiba lah pyndep bad 12 tylli kiba sah pat yn sa pyndep ha kine ki bnai ban wan.

Ka la ïathuh ruh ba la ai ram khlem ka sut haduh T.10 lak tyngka kum ka jingsdang ïa ka kam na ka bynta ki nongsaiñ bad pynïaidïew ïa u kwai bad kane la ai sha ki 46 tylli ki cooperatives. 

Ka kong Ampareen ka la ong ruh ba u kwai u long uwei napdeng ki mar ba ka tnad ka rep ka riang kan kham phaikhmat ha kine ki snem ban wa haba jubab artad ïa ka jingkylli u MLA UDP na Mawkyrwat u Bah Renikton Lyngdoh Tongkhar, uba kwah ban tip la yn pdiang ïa u kwai kum uwei napdeng ki marrep kiba lah ban shalan shabar ri.