Yn shim rai ka Sorkar ban pynkynriah ia ki longiing na Them Metor shwa ban kut u snem: Dy CM

Syllad | The Rising MeghalayaOctober 26, 2024

Ka Sorkar Jylla ka la rai ban shim ia ka rai kaba khatduh ha kaba iadei bad ka jingthmu ban pynkynriah noh ia ki 342 tylli ki longiing napoh Them Metor, Iew Mawlong hashwa ban kut une u snem.

Haba pyntip ia kane ha ka 25 tarik u Risaw, u Symbud Myntri Rangbah uba khmih ia ka Tnad pynroi sor u Bah Sniawbhalang Dhar u la ong, “Phi tip bha ia kiei kiei baroh ba la pynkhreh da ka sorkar. Kumta lehse ngi lah ban shim ia ka rai kaba khatduh ha kaba kut jong u bnai Naiwieng 2024.”

“Kyrmen skhem, lada ym dei ha u Naiwieng hynrei shwa ban kut jong une u snem ngin shim ia ka rai kaba khatduh kum ka sorkar ha kaba iadei bad kane ka mat,” u la ong.

U Bah Sniawbhalang ula ong ba na ka liang ka sorkar ka dang ap hadien ba ka la don ka jingkyrpad da ka kynhun jong ka Harijan Panchayat Committee (HPC).

Halor ka rai jong ka sorkar ban thoh sha ki bor jong ka Tnad Defence ban ai jaka halor ka jingthmu pynkynriah ia kine ki nongshong shnong, u Symbud Myntri u la ong, “Ngam kren ha kaba iadei bad ka Tnad Defence. Ki kwah ia ka jaka jong ka Defence hynrei ka jaka ka jong ngi ka dei kaba la dep ban pynkhreh katkum ka blueprint. Kumta ki dang don katto katne ki jingiakren kiba dang sah, kumta ngin lah ban lah ban shim ia ka rai kaba khatduh.”

Watla katta u la ong ba na ka liang ka Sorkar ka la ban jur ba ka jingpynkynriah ka dei ban long katkum ka blueprint.

“Hooid ngi la iai pynbor katkum ka Blueprint ka jong ngi. Hynrei namar ba ka dang don ka jingiakren bad ki bynta kiba dang sah, kumta ngi dang ap ia kata.Hynrei ngi kwah ban pynkut noh ia kane ka phang, kata lada ym dei ha u Naiwieng kan long hashwa kaba kut jong une u snem,” ong u Bah Sniawbhalang.

Haba kylli u la ong ba ka jingkyrpad ia ka jaka ka Tnad Defence ka dei ka jingai jingmut ba la ai da ka HPC.

“Ka dei ka jingai jingmut ka jong ki (HPC). Lada ngi ioh ka long kaba biang bha, kumta balei ba ngin ai da ka jaka jong ngi.Ka long kaba suk da kaba bynrap, “Ngi dang wad ia ki lad ki lynti.Lada jia ryngkhat bad ngi ioh ia ka jaka ka tnad Defence, ngin ym donkam shuh ban ai da ka jaka jong ka sorkar Jylla.Kaba khatduh lada ngi ioh ia ka jubab na ka Tnad Defence bad ba kam don jaka, ngi hap ban iaid shakhmat da ka jaka ka jong ngi.”

Shuh shuh u la ong ba katkum ka Blueprint ka jingpynkynriah ia kitei ki longiing kan long ha ka jaka kaba 2-3 akar.