Yn shimti ka kompeni thymmai ia jingshakri ka 108 hapoh ka artaiew: Ampareen

Syllad | The Rising MeghalayaNovember 1, 2023

Ka Myntri ka Tnat ka Koit ka khiah ka sorkar jylla ka Kong Ampareen Lyngdoh haka sngi Balang ka la ong ba ka kompeni bathymmai kan shimti noh ia ka jingai jingshakri jong ka 108 hapoh kine ki artaiew.

Haba kren sha ki lad pathai khubor, ka Myntri ka pyntip ba ka Tnat ka sngewkmen ba ha kane ka kynti kaba mynta ki la don haduh hynniew tylli ki kompeni kiba ia khiehduh na ka bynta ban ioh pyniaid ia kane ka jingshakri, kata kaba la wan jia ha ka sien kaba nyngkong eh.

“Nga kyrmen ba kan kan wanrah ia ka jingseisoh ha kaba iadei bad ka jingai jingshakri ia ki paidbah ka jylla,” ka la ong. Halor ka jingkylli, ka Kong Ampareen ka la ong; “Ngi khmih lynti ban lah ban pyndep ne pynkut noh ia kane ka bynta mynta ka sngi, hynrei ka kompeni bathymmai ka lah ban shimti ia ka jingtreikam kaba pura hapoh jong kine ki artaiew ki ban wan.”

Ha ka jingiakynduh ka jong ka bad ki nongtrei ka 108 hynnin ka sngi ba Ar, ka Myntri ka la ong ba ka dei tang ka jingbteng jong ka jingkut jingmut kum ka sorkar ban pynthikna ba ki nongtrei jong ka 108 kin sngew skhem bad shaniah ba ka sorkar ka pyrshang ia kaba bha tam ban pynthikna na ka bynta ban aijingiada halor ki hok jong ki nongtrei ka 108.

Ka Myntri ka pyntip ruh ba man ki kompeni ki la ioh ia ka jingkyntu ban wanrah bad pyni ia ka plan kaba iadei na ka bynta ka bha ka miat jong ki nongtrei 108. “Ki bynta kiba iadei kum ka insurance, ki jingsiew, ki jingiarap halor ka koit ka khiah,  accident insurance ki dei kiba la kular da baroh ki kompeni kiba kwah ban shimti ia ka jingpyniaid ia ka jingtreikam jong ka 108.

“Nalor kata ka long ruh kaba kongsan ban pynthikna halor ka jingkyntiew ia ka jingsiew ne increment sha ki nongtrei ka 108 na ka por sha ka por, kata ha kaba ka la don ruh ka jingkular ban kyntiew ia ka jingsiew da 7 percent da baroh kine ki kompeni kiba iashim bynta ha ka jingiakhliehdor,” ong ka Myntri.

Ka Myntri ka la ong ba kane ka jingiakynduh bad ki nongtrei ka 108 ka long tang ban iamir jingmut bad ki khnang ban pynthikn ha ki ba ngi sngewkhia halor ka lawei kaba iadei bad ka kam ka jam ka jong ki, bad ngi la bthah ruh sha ki halor ki sienjam kiba ki dei ban leh bad pyndep.

Ha kajuh ka por ka Myntri ka la ong ba kan don ka jingleh ia ki test halor ka jinglah bad jingtbit jong ki nongtrei, bad kin tyrwa ia ka kam bad jingsiew da kaba pynshong nongrim ruh halor ka jinglah bad ka jingtbit ka jong ki.