Yn shna Cricket Stadium ka AJCA ha Ummulong

Syllad | The Rising MeghalayaApril 24, 2021

Ban ioh iaka jaka kaba heh ha kine ki sngi kalong kaba eh namar ka jingrem ka jaka, hynrei ka jingjynsur bad ka jingiohi jngai jong ka Dorbar Shnong Ummulong kala pynurlong iaka jingthmu jong ka All Jaintia Cricket Association (AJCA) ban ioh jaka kaba heh haduh 5 acres ban shna madan ne stadium Cricket ha West Jaintia Hills District.

Kane ka jaka kaba ka dorbar shnong Ummulong kala ai sha ka AJCA ka dei haka dur jong ka jingai wai kaba la tip kum ka ‘leased’ na ka bynta 30 snem bad ka jaka ka heh haduh 20.563 square meters ne 5 acres kaba don ha Phangsamyntiñ, Ummulong.

Ia soskular la ia soi haka sngi Saitjain ha katei ka jaka haka jingiadonlang ki nongialam shnong ka dorbar shnong Ummulong naduh u Waheh Shnong u ma Leo Laloo, Easterius Shylla general secretary Ummulong bad u ma Manbha Shylla chairman shnong Ummulong, katba naka AJCA la iadonlang u president ma Edystone Shylla, u Waibor Sohlang general secretary AJCA bad ki nongialam bad dkhot ka Meghalaya Cricket Association (MCA) kaba dei ka guarantor ha kane kam kaba kynthup ia u Bah Gideon Kharkongor, Honorary Secretary MCA, Dhruva Thakuria, Treasurer MCA.

“Ka dei ka sngi ka ban sah kynmaw haka history jong ka AJCA bad ka dorbar shnong Ummulong ban pynkylla ia kane ka jaka kaba heh kum kawei na ki stadium cricket,” la ong u president AJCA u ma Edystone Shylla.

“Ngi la shim wai ia kane ka jaka naka shnong Ummulong kaba heh 5 acre namar kalong kaba eh bha ia ngi ban ioh ka jaka bad ngim banse namar ba ka shitom bha iaka AJCA ban pynlong kino kino ki lympung ialehkai cricket ba kam don iaka madan ka pura bad da ka jingioh ia kane ka madan ngi kyrmen ba ngin lah ban kyntiew iaka kam ialehkai Cricket haka district bad ka jylla baroh kawei,” ong shuh shuh u ma Edy.

U Ma Edy ula khublei kyrpang iaka dorbar shnong Ummulong bad ka shnong baroh kawei kaba la pdiang iaka jingtyrwa jong ngi ban pynkylla ia katei ka jaka kum ka madan ialehkai cricket ban myntoi ki khun samla bad ki khynnah ialehkai ka district.