Yn shna ka Sorkar 50 tylli ki pung pynroi symbai dohkha ban kyntiew ia ka jingpynmih dohkha: CM

Syllad | The Rising MeghalayaAugust 31, 2024

U Myntri Rangbah ka Jylla u Conrad K Sangma haka 30 tarik Nailar u la ong ba na ka liang ka Sorkar ka la pynkhreh ban shna haduh 50 tylli ki pung pynroi symbai dohkha khnang ban kyntiew ia ka jingpynmih dohkha ha ka Jylla.

“Ka jingpynkhreh ban shna haduh 50 tylli ki pung pynroi symbai dohkha ka la iaid shakhmat. Ngi la pyrshang ban kyntiew ia ka jingpynmih dohkha namar ka jingjur jong ka jingdawa,” ong u Conrad haba jubab ia ka jingkylli hapoh ka Iingdorbar.

U la ong ba na kine, khyndai tylli ki pung pynroi symbai dohkha ki la treikam bad 41 tylli kiwei pat kin sa sdang ban treikam noh shen.

Ha ka jingpynpaw jong u, u CM u la ong ba ka Meghalaya ka la sakhi ia ka jingduna dohkha kaba kot jan haduh 12,000 metric tons, kata kaba long haduh kumba T.250 klur.

Nalor kata u la ong ba ka don ka por ha kaba ka Meghalaya ka la hap ban pynpoi haduh jan kumba 75% ka dohkha na shabar ka Jylla.

“Mynta hadien hadien baroh ki sienjam ba la shim, ar bad lai bynta la lah ban pynmih dohkha na la ka jong ka Jylla. Ka la shim por na ka bynta jong ngi ban leh ha ka rukom kaba heh hynrei kiei kiei ki la iaid ha ka lynti kaba dei biang,” u la bynrap.

U Myntri Rangbah u la pyntip ruh ba nalor ka jingai ia ki jinghikai ban pynbha ia ka kam pynmih dohkha, na ka liang ka sorkar ka la pynioh ruh haduh 5 million ki symbai dohkha.

Na ka liang ka Sorkar ka la pynlut haduh  kumba T.67 haduh T.72 klur ban kyntiew ia ka kam pynmih dohkha ha kine ki ar haduh saw snem ba la dep.

Ha kajuh ka por, u Myntri Rangbah u la pynbna ruh ia ka rai jong ka sorkar ban teh kyndon noh ha kaba iadei bad ki jingpynlong ia ki jingiakop khwai dohkha ha ka jylla.

La plie ia ka jaka pynroi symbai dohkha ba nyngkong lyngba ka MGNREGA ha Lahalein