Yn shna ka Sorkar da ka Addict Treatment Facility ha Umsawli ban sumar ia kiba dih drok

Syllad | The Rising MeghalayaApril 11, 2025

Ka Sorkar Jylla ka la rai ban shna ia ka Addict Treatment Facility (ATF) ha Umsawli kaba hap hapoh New Shillong Township na ka bynta ban aijingsumar ia kiba ngop ha u drok khlem da donkam kano kano ka jinglut jingsep.

Ia kane ka rai la shim ha ka jingialang jong ka Drug Reduction Elimination & Action Mission (DREAM) ba la pyniaid da u Myntri ka Tnad Social Welfare u Bah Paul Lyngdoh ha ka 10 tarik Iaiong.

Ha kane ka jingialang la wan iashim bynta ruh da ka Director General of Police (DGP) Kong Idashisha Nongrang, Mission Director ka DREAM Bah Francis G Kharshiing, SP ka Anti-Narcotic Task Force (ANTF), DHS, Medical Superintendent ka Shillong Civil Hospital nalor kiwei kiwei.

Haba kren sha ki lad pathai khubor, u Bah Paul u la ong ba ka jingdon jong ki nongdih drok ba la rah na ki surok bad kiwei pat ki bynta jong ka nongbah kim don satia ia kino kino ki jaka ban aijingsumar, ban pynkhuid ia u drok bad ban ioh ia ka jingiasyllok.

“Khnang ban pynioh ia kine ki lad jingiarap na ka bynta kine kiba ngop ha u drok, kane ka jingialang mynta ka sngi ka la rai ba ngin pyniaid shakhmat kumba ngi la iakren ha ka jingialang ba khatduh jong ka DREAM project na ka bynta ban pynkha ia kaei kaba ki khot ka Addict Treatment Facility (ATF),” u la ong.

U la ong ruh ha kane ka ATF, ngin don ia ki Psychiatrist kiba la shah hikai pyntbit, ki jingthiah bad jaka sah, ngin don ia ki nongiasyllok na ka bynta kiba dih drok. Ka jingmut hi ka ong ba shisien ba ngi la pyndep ia ka jingsumar ban pynkhuid ia u drok bad ban iasyllok, kin long kiba la bit ban ia im ryngkat hapoh ka imlang ka sahlang.

Ia kane ka ATF u la ong ba yn shna ha Umsawli, kata ka jaka kaba la don lypa ka Covid Centre kaba la biang lut ia ki jingdonkam bad ngi shu donkam ban pynbiang tang ia kiba duna ha kane ka centre da kaba bynrap ba ka Tnad kan sa pynbiang ia baroh ki jingdonkam kaba iadei bad ki nongtrei.

Shimti biang ka tnad tourism ia ka Nan Polok, T.18 klur mang ban tei ia ki jingpynbyrngia

U Bah Paul u pyntip ruh ba hapoh kine ki ar sngi, ka kynhun ban ialam da u Mission Director ka DREAM kan leit jurip ia kane ka centre ha Umsawlai khnang ban khmih bniah ia ki jingpynkhreh. “Ka kynhun kan sa pyntip pat sha nga hadien ba la pyndep ia kane, hynrei ia ka rai ba la shim ka long ba ngin pyniaid shakhmat ban buh ia kane ka ATF.”

Haba kylli, u Myntri u pyntip ba ka pisa ka la dep don lypa bad ka DREAM Mission na ka bynta ban buh ia kane ka jaka sumar. “Ngin pyntrei ia ki kam da ki bynta bynta ha kaba ha ka bynta kaba nyngkong ka dei ban kot hapdeng ka T.50 haduh 70 lak.”

Ba bun kiba pass, pynsangeh shwa ka Sorkar ia ka jingpynrung klas ban ym duh klas ki samla

Katkum ka jingpynpaw jong u, la ong ba ka pisa ka la don mynta bad ka Tnad bad kaba la wan lyngba ka Ministry of Social Justice and Empowerment bad ki don ruh ki bynta ba la ioh na ka Tnad ka koit ka khiah ban iarap aijingsumar ia kiba ngop ha u drok khlem kano kano ka jingsiew.

U Myntri u la pyntip ruh ba watla ka jingdon jong ki nongdih drok ka la hiar hynrei ka dang long ka jingeh kaba khraw namar ka jylla ka don ia baroh ki rta jong kiba ngop ha u drok bad khamtam eh kiba dang khie samla, ki samla bad wat kiba la san kiba pyndonkam khah khah ia u drok ne ne don bynta ha ki kam khaii drok.