Yn shong kyllain myngngor ka JAC, ai khublei ka MNKDC ba la thung nurse ha Namdong PHC

Syllad | The Rising MeghalayaMarch 26, 2021

Ka Joint Action Committee kaba kynthup iaka FKJGP, KSU bad ka synjuk waheh shnong Namdong kala rai ban shong kyllain myngngor haka 27 tarik u Lber 2021 namar ba kuman ka tnad ka koit ka khiah jong ka jylla ban thung doktor bad nongtrei ha Namdong PHC.

Kane ka jingshong kyllain myngngor ka JAC kan long ha phyllaw ka Namdong PHC naduh la por mynstep lashai ka sngi.

U secretary ka JAC u Juhhi Tariang, ula ong ba ia kane ka rai kila shim hadien ba kila wan iakynduh iaka bor ba dei peit ka tnad ka koit ka khiah, hynrei la leh kuman ban pynurlong ia ki jingdawa ka JAC ban thung nongtrei, doktor bad kiwei kiwei kiba don haduh 8 tylli ki mat jingdawa ban pynbiang ha PHC.

Ha kawei pat ka khubor ka Mynsngat Namdong Khanduli Development Committee (MNKDC) kala pynpaw iaka jingsngewnguh iaka sorkar MDA, U Local MLA uba long ruh u Myntri Sorkar u ma Sniawbhalang Dhar, ka Office jong u DMHO, DHS (MI) kiba la ialeh ban pynbiang ia ki jingdonkam ka Namdong PHC.

Ki nongialam ka MNKDC u Denis Dkhar bad u Yoshida Nongspung kiba long ki president bad secretary kila pynpaw ia ka jingiaroh ia u Doctor I/C ryngkat ki Staff baroh kawei ba hapdeng ki jingduna ki staff ki la trei shitom ban peit iaki nongpang haka PHC bad haki Sub-Centre naka bynta ki jingdonkam jong u paidbah.

Ka MNKDC kila pynpaw ba ka sorkar lyngba ka tnad ka koit ka khiah kala thung staff Nurse ha katei ka PHC bad kala kyntu ruh iaka tnad ka koit ka khiah ban thung sa ia ki doktor bad kiwei kiwei ki nongtrei khnang ba ka PHC kan lah ban ai iaka jingshakri kaba pura.

Kane ka commitee kala kyntu iaki JAC (Joint Action Committee) ba kin long kiba iaishah ban iatreilang naka bynta ka jingbit jingbiang jong ki paidbah ka thaiñ.