Yn shong kyllaiñ myngngor ki 6 Shnong ba kuman ka tnad ka koit ka khiah ban kynriah iaka PHC Mawryngkneng

Syllad | The Rising MeghalayaAugust 17, 2020

Ban pyrshah iaka leh kuman ka sorkar bad ka tnad ka koit ka khiah jong ka sorkar Jylla, ka Synjuk ki Dorbar 6 -Shnong ba kynthup iaka shnong Mawryngkneng, Kut, Puriang, Pommura, Thangshalai bad Ksehpyndeng da kawei ka sur ki la pynbna paidbah ban pynlong ka jingiakhih shong kyllaiñ myngngor haka 19 tarik mynta u bnai ha phyllaw ka Primary Health Care (PHC), Mawrynkneng, East Khasi Hills District.

Ka Synjuk Ki Dorbar 6 Shnong ka la iathuh ba, haka jingialang kaba la long haka bnai 12/06/2020 ha PHC Mawryngkneng haka jingiadonlang u MLA bad MDC ka thain u Bah David Nongrum bad u Bah Pyniaid Sing Syiem kumjuh ki Sordar Shnong, ki Doktor ka PHC Mawryngkneng, DMHO, u Director jong ka Health Services u Dr. A. War ula kular ba hapoh u bnai Naitung yn pynkynriah noh ïaka PHC barim shaka building kaba thymmai.

Nalor kata ula kular ban pynpoi ïa u Transformer naka bynta ban pynbiang bording hapoh ka building kaba thymmai, hynrei haduh mynta ym don kino kino ki dak ki shin.

Hadien ba la leh klet ia kaei kaba la kular haka 06/07/2020 ka Synjuk ka la phah ïaka shithi pynkynmaw ïa u Director Health Services u Dr. A. War halor ki jingkular jong u hynrei haduh mynta mynne ym ïoh jubab eiei bad kane kala pynbitar iaki 6 shnong.

Ka Synjuk ka la ong kumba long mynta ki paidbah ki kynduh sa kawei pat ka jingeh kata haba ki leit phah sumar ha PHC Mawryngkneng, ki doktor kim nud shuh ban sumar bad examine ïa kiba pang ba shitom namar bym don ki tiar jingïada ïaki na u khniang COVID-19 bad ïaki nongpang ruh la shu thoh tang ka slip bad ai dawai beit khlem da sumar ne examine ban tip ïaki jingpang jingshitom.

“Kane kadei kawei na ki jingeh kaba ki paidbah kiba leit phah sumar bad shim dawai ha PHC Mawryngkneng ki ïakynduh jingeh nalor kata ym don ki Ambulance ban kit ïaki ba pang ba shitom ban leit buh sha sor Shillong,” ong u Bah Peter J Lawai Sordar Shnong Mawryngkneng –cum- Chairman Synjuk Ki Sordar 6 Shnong.

“Kum ka dak ban pynpaw iaka jingpyrshah ïaka jingleh sting bad thok ïaki nongïalam shnong bad u paidbah jong ka thain, ka Synjuk ka la shim ïaka rai kaba tyngeh ban pynbor iaka sorkar ban pynurlong iaka jingdawa jong ngi bad haka 19 tarik ngin jingshong kyllain myngngor hapoh phyllaw jong ka PHC Mawryngkneng da ki Sordar jong ka 6 tylli ki Dorbar Shnong,” ong shuh shuh u Bah Lawai.