Yn shongkyllaiñ myngngor ki nongtrei bylla ka MeECL

Syllad | The Rising MeghalayaMarch 11, 2019

JOWAI: Ki nongtrei  bylla ka MeECL  hapoh ka lama jong ka  MeECL Progressive Workers’ Union (MPWU) kin pynlong ia ka jingshong kyllain myngngor ha ka 12 tarik une u bnai ha Additional Secretariat Parking Lot, Shillong ban pynpaw ia ka jingpyrshah ïa ki bor ba halor ka MeECL  namar ka jingsngap mynthi  jong ki  ban khot ïakren ia ki nongialam ka Union. Ka Union ka la ai jingthoh la arsien ban kyrpad ïaka Management ban khot iakren khnang ba yn  lah ban pynpaw  bad iatai sani ia ki jingeh ba ia kynduh.

Ka kong Angelina Hynniewta, General Secretary MeECL Progressive Workers’ Union ha u kyrwoh ba kala phah kala pynpaw ba ki nongtrei kiba don emergency duty ban pynbiang bor ding lane shift duty ha ki power house ne Control Room ne Sub Station kin leit trei hi ha kata ka sngi khnang ba kan ym ktah ia ka jingpynbiang bording na ka bynta ki jingdonkam ki paitbah.

Ka Kong Angelina kala pynpaw ba ki mat jingdawa ki long ban shna bad thaw ia ki rule bad policy ban pynskhem ïa ki nogtrei bylla kiba la trei slem (Regularization), ban pyntreikam ia ka rai ka Supreme Court of India na ka bynta ka Equal pay for Works, ban ithuh pura ia ka Union kum ka seng ki nongtrei bylla bad ban sangeh kaba wanrah nongtrei nabar (Outsourcing). Nalor kine ka Union ka dawa ba ka MeECL ka dei ban pyntrei kam noh bad ryntih ia ki jingmyntoi  ba  dei ban ioh na kaba iasoi Contract. Naduh u bnai August 2018 la dep ban iasoi contract hapdeng ki nongtrei bylla bad ka MeECL,  hynrei haduh mynta dang don ki jingmyntoi ki bym pat ioh.

Ka pynpaw shuh shuh ba ki nongtrei kiba trei ha Mawsynram, Mawkyrwat, Dalu, Phulbari bad kiwei kiwei ki don hapdeng ka jingsheptieng ioh shah pynduh kam ne shah pynkynriah sha kiwei pat ki jaka namar ka MeECL  ka la aiti ha ki Company ban trei ia ki kam ba ki ju trei. Kane ka jingleh ka MeECL ka buh ia ka jingma ia ka lawei ioh kam ioh jam ki khun samla jongka jylla hi baroh. Ka Union kan sa pan RTI na ki District Council ban tip la kine ki Company ki lah ioh NOC lane Trading License ne em ban treikam hapoh jylla.Kumta ka Union ka khot kyrpad bad wer ia ki Seng Bhalang baroh ba don hapoh ka jylla ban pyrshah tyngeh ia kane ka jingai Contract jongka MeECL sha ki Company ba wan nabar.