Yn siang artificial turf noh ha madan Deinchynrum pynbna u Ma Kyrmen Shylla

Syllad | The Rising MeghalayaAugust 13, 2022

U Myntri ka sorkar Jylla u Kyrmen Shylla uba long ruh u MLA Khliehriat ula pynbna paidbah ban pynioh madan plastic ne artificial turf ha Deinchynrum, ka madan ialehkai jong ka East Jaintia District Sports Association.

Ia kane u ma Kyrmen ula pynbna paidbah haka phainal jong ka Kyrmen Foundation Knockout Football Tournament 2022 kaba long haka sngi Thohdieng. Kane football la pynlong haka jingiatreiang ka EJDSA.

Ula ïathuh ba ophisar bad ki engineer ki la wan jurip ïa kane ka madan bad la buh thong ban pyndep iaka jingsiang ia une u phlang plastic hashwa u bnai Nohprah (December) jong une u snem.

Ha kane lympung la pynlong halor ka phang “Say no to drugs, yes to Football”, kaba la wan ïashim bynta 32 kynhun haka liang ki shynrang bad 6 kynhun haka liang ki kynthei.

U Speaker Meghalaya Legislative Assembly Bah Metbah Lyngdoh uba long u kongsan ula ong ka jingïalehkai Football kadei kawei na ki jait jingialehkai ha kaba kiba bun ki riew donsap kiba trei shitom ki lah ban pynlong ïaka kum kawei na ki lad kamai jakpoh.

Ka Jaiñtia Hills ka lah shisha ban sei ïa kiba bun ki rangïalehkai kiba mihkhmat bad paw khmat ymdei tang hapoh ka Jylla hynrei ïaka ri India. Ka long ruh ka jingsarong iaka East Jaintia Hills ba u Halender Nongtdu uba ïalam ïaka India kum u captain kila jop dang pyrshah ïaka ri Bangladesh haka lympung ïalehkai SAFF U-20 Championship kaba la long ha Bhubaneswar.

Haba ïadei bad u drok, ula kyntu jur ïaki khun samla ka thaiñ ba kim dei satia ba ngop haki jingdih kiba sniew hynrei ban nangïai trei shitom ban poi shaka thong.

“Kum u trai jong ka Shillong Lajong ymlah ban len, khlem ka jingsynnniang ki rang ïalehkai jong ka thaiñ Jaintia kiba mynshwa bad kiba mynta ka Lajong kan nym poi sha ka I-League haka por jong u snem 2008-2009 bad ka Lajong kan nyn dei ka Team kaba pawnam haka thaiñ shatei lammihngi bad kumjuh haka India”, la ong u President ka MFA u Bah Larsing M Sawian.

Ula bynrap ba dei lyngba u synniang u bynhei ki rangïalehkai jong ka rilum Jaintia ba ka Shillong Lajong ka la poi haduh ka kyrdan kaba ki paidbah ki la sakhi.

U kyrmen bad da ka jingwan u Artificial turf ka East Jaiñtia Hills District kan sa pynmih shibun ki rangïalehkai na kane ka thaiñ ki ban mihkhmat ïaka Jylla bad ka ri.

Ha kane ka sngi la pynkup burom ruh iaki nongialehkai, nongtem nongrwai, ki riew pawkhmat ka district.

Ha ka jingiakhun final na kaliang ki shynrang ka Rymbai Deiñshalalu ka la pynrem ïaka Cham Cham & Mutong & Lumshyrmit FC da 4-1. Katba haka liang ki kynthei ka Soaring Eagles SC ka la pynrem ïaka Wonder Phonix SC da 1-0.

Ka  Rymbai Deiñshalalu kaba long ka lahduh ka la khur ïaka song pisa kaba 2 lak tyngka ryngkat ka trophy, katba ka Soaring Eagles SC kaba long ka lahduh haka liang ki kynthei ka la ïoh khur ïaka song pisa kaba 30 hajar tyngka ryngkat ka trophy.

Ka lahduh ba ar na ki shynrang ka Cham Cham & Mutong & Lumshyrmit FC ka la ïoh ïaka song pisa kaba 70 hajar tyngka ryngkat ka trophy katba ka Wonder Phonix SC ka la ïoh 20 hajar tyngka.

La sam ruh ïaka khusnam player of the Match sha ka Batbitbha Bareh na ka Soaring Eagles SC bad u Hesmiki Rymbai na Rymbai Deiñshalalu.