Yn synreit dawai khniang ka Panaliar, khang ban iaid kai sha Syntu Ksiar

Syllad | The Rising MeghalayaJuly 31, 2020

Ka Shnong Panaliar Jowai kum shi bynta ban iakhun pyrshah bad pyndkut ia u kynjri jingpur u khniang jingpang COVID-19 shapoh ka shnong ka thaw kala pynkhreh ban synreit dawai khniang haki bynta ka shnong khamtam shaki lynti iaid lyngba ka MCH, Jowai.

Ka Dorbar Shnong Panaliar kala rai ban synreit dawai sha baroh ki dong ki shnat bapher bapher ka shnong Panaliar haka jinglam khmat jong ka Village Defence Party (VDP) bad Village COVID-19 Management Committee ka Shnong Panaliar.

U President VDP u Fourkey Sumer bad u Secretary u Lakhon Rymbai kumjuh ki dkhot VDP kin long ki nonglam lynti ki ban peit bad sylli ia baroh ki dukan dukdoh.

La pyntip ba la sdang biang iaka ïew kaba lai sien shi taïew katkum ki hukum sorkar bad la bthah iaki nongdie ba ki dei ban deng iaki mask, ban buh iaki jaka saitkti bad ka jingia jngai iwei na iwei kaba ym duna iaka 5 phut ka jingjngai bad la mana ban die tiar sha ki bym deng mask.

U Waheh Shnong ka Panaliar u Riquoma Rq. Laloo ula ong ba ka shnong Panaliar kala khang pyrshah iaki briew ba nabar shnong ban leit sha Pynthorwah, Syntu Ksiar kiba dei ki jaka bajuh sngewtynnad ban leit shangkai pyngngad.

La khang pyrshah ruh iaki nongleit khwai ne nongleit bam doh ban wan palat iaka por 8 baje janmiet bad lada lap ki dkhot VDP ki lah ban kem bad pynshitom katkum ki aiñ shnong.

La kyntu ia uwei pa uwei ban sumar ialade da kaba bud iaki SOP ba la pynbna da ka sorkar kumjuh ki shnong bapher bapher.

‘Ngi hap ban im ryngkat bad une u khniang, hynrei dei ban nang ban burom uwei ia uwei khnang ban lait na ka jingiabit bad pynsaphriang ia une khniang jingpang,” ong u ma Laloo

Ka Shnong Panaliar ka la kyntu iaki nongshong shnong, ki lok ki jor ba rung ba mih lyngba la Panaliar ban sngewbha ban kiar na ka jingwan rung shapoh shnong pohthaw lada ym dawa palat ka kam namar ka jingrung jingmih ka long kumba ailad ia u khñiang ban snoh na uwei ha kawei bad rah ruh kylleng kylleng.

Ka VDP bad da kaba bud iaki hukum sorkar, kala bthah ia baroh ki dukan hapoh u pud u sam jong ka shnong Panaliar kin khang thik haka por 6.00 baje janmiet. La khang ban shong bun ngut sharud surok ne ki jaka kynjah bad la khang ruh ban pynieng kali khlem akor harud surok.

Ka Village COVID-19 Management Committee na ka por sha ka peit bad sylli bniah iaka leit ka wan jong ki briew shapoh shnong bad kan sa pynbna shuh iaki aiñ ha kaba iadei bad ka kam khawai dawai bad haba iap briew.