Yn talasi ka KSU ban khanglad ia ki bar jylla ban rung shapoh Meghalaya

Syllad | The Rising MeghalayaMay 31, 2020

Ka Khasi Students’ Union (KSU) Central Executive Council, kala kren shai kdar sha ka sorkar, ba ka KSU kan pyrshah ia ka rai jong ka Sorkar jylla ban ailad noh ia ki nongtrei bylla kiba dei na bar jylla ba kin wan trei hapoh ka jylla. Lada ka Sorkar ka ong ban shah noh ia ki nong bylla bar jylla ba kin wan trei noh hapoh ka jylla.

Ka KSU kala buh jingkylli, mano ban shim ka jing bahklieh bad kine ki bar jylla kin hap ne em ban shong quarantine shwa 14 sngi/28 sngi ha shwa ba kin leit trei ha ki kam ba ki trei, ne kin leit beit beit sha jaka ba ki trei?

Nalor kata lada ki hap ban shong quarantine mano ban pyn biang jaka?, mano ban bei iaka bai lut bai sep?

Ka KSU kala ong, wat tang ia ki trai shnong ki trai ri trai muluk kiba wan phai na kiwei ki jylla jong ka Ri India, ka Sorkar ka kren shai ba kam lah satia ban pynbiang lut ia ki quarantine centre, hynrei la hap shim lang ka jingkit khlieh da ki Dorbar Shnong- ki it ki hima. Ka Seng hi kan nym pdiang satia ia katei ka rai jong ka Sorkar bad ha ka juh ka por ka kyntu iaka Sorkar ba kan pyrkhat sani bha sa shisien sa shiwat, namar wei ba ailad ban wan, kim shym wan tang wei ne ar ngut hynrei da ki spah ngut ne hajar ngut kin wan bad kin don ruh ki ban shim kabu ban ioh bsuh khlieh ha ka Jylla.

Ka KSU ka kyntu ruh iaka sorkar ba ia ka inter – state movement, ia mynta hi kam pat long satia ban shu ai laitlan ne ban shah rung katba mon, laitnoh ha ki kam ba long kyrkieh, kiba donkam ne ha ki kam sumar ha ka pang ka shitom ba shah ka kam, hynrei ia kiwei ki kam bym da dei eh kiba donkam kyrkieh haduh katta katta, ym dei ban ailad dei ban pyrkhing shwa, namar lada shu bishar naka jylla ba mar jan tam, ka Assam ka nangkiew ha ka jing don ki briew kiba ioh covid19 ne Corona virus. Kam pat dei ka por ban khein shngaiñ ne ban shim sting ioh ka ialam sha kaba kham mynsaw shuh shuh iaka jylla baroh kawei.

Ka KSU ka wer ka khot ia baroh ki para ri ban ia snoh kti lang bad shim lang ka jingkitkhlieh da kaba nym wan ialam ia ki nongtrei bar jylla hynrei ban shim ruh ia kane ka lad da kaba phai khmat sha ki para Ri ban aikam  ai jam ba kin trei, ban lait na ki kynrum kynram bad ha kajuh ka por kiba bun ki para Ri ki la lah wat ban trei ha kiba bun ki kam bapher bapher bad kane kadei ka ïa ba ngin kyntiew iala ki para Ri.

Ka KSU CEC, kala bthah ïa baroh ki tnad trei kam jong ka ha kylleng ka bri u hynñiewtrep ban long kiba peitngor iaka jingrung ki bar jylla ne ki mynder ri, ha ki jaka rung jaka mih bapher bapher haka Jylla, ban nym ailad la kidei kiba wan bylla ne kiwei ki kam ba ki trei, wat lada dei ban mih madan ban talasi ruh dei ban leh ban nym ai lad iaka jingwan rung laitlan ki bar jylla ha kaba kum kane kapor.