Yn thaw ia ka Delimitation Committee ban pynbeit thymmai ia ki constituency ka JHADC

Syllad | The Rising MeghalayaNovember 25, 2023

Ki jaka puta kiba hap hapoh ki 29 tylli ki constituency jong ka Jaintia Hills Autonomous District Council (JHADC) ki donkam ban pynbeit bad pynwandur thymmai hashwa ba kin leit sha ka election ba la pynkhreh ban pynlong ha u bnai Rymphang 2024.

Kane ka la wan long ruh hadien ba ka JHADC ka la ioh ia ka jingmynjur na u Lat ka jylla na ka bynta ban thaw ia ka Delimitation Committee na ka bynta ban pynbeit thymmai bad ban phiah ia ki constituency hapoh ka jingkhmih ka jong ka.

Ka khubor ba la ioh pdiang da ka JHADC lyngba ka Meghalaya District Council Affairs department ha kine ki khyndiat sngi ba la dep ka pyntip ba na ka liang u Lat u la pdiang ha kaba iadei bad ka jingkyrpad ka jong ki.

U Lat ka jylla u la hukum ruh ia ka JHADC ba kan pynkylla ia ka Assam and Meghalaya Autonomous Districts (Constitution of District Councils) Rules, 1951 khnang ban lah ban ban pyntreikam ia ki kyndon ha ka rukom kaba dei na ka bynta ban pyntreikam ia ka jingphiah constituency hadien habud.

Na ka liang u Lat u la hukum ruh ia ka JHADC ba kan thaw ia ka Delimitation Committee ha ryngkat ki kyndon ain hapoh jong ka bad ba ki dkhot jong ka ki dei ban long kiba la shemphang bha halor ki kam synshar khadar, kata kynthup ia kito kiba la don ka jingtbit ha ki kam sain hima bad ki kam kiba iadei bad u paidbah.

Ka delimitation committee kan thaw ia la ki jong ki kyndon na ka bynta ki jingtreikam jong ka bad ban wanrah ia ki kyndon na ka bynta ka jingtyrwa ia ka delimitation bill na ka bynta ka jingtip jong ki paidbah.

Ka Delimitation Committee ka dei ruh ban ioh pdiang ia ki jingai jingmut, ki jingpyrshah, ki jingpynpaw bad ki jingkynthoh na ki paidbah.

Shuh shuh ka Committee ka dei ruh ban pynlong ia ki jingpynsngew paidbah ha ki jaka ba la pynkhreh bad ban pynthikna ba kan don ka jingpdiang bad ka jingkyntait ia ki jingai jingmut, ki jingpyrshah lane ki jingpynpaw bad ki jingkynthoh hashwa ban phah ia ka kaiphot.