Yn thaw ka Meghalaya-Assam da ka Joint Committee halor ka jingkynnoh shlei um namar ka USTM

Syllad | The Rising MeghalayaSeptember 5, 2024

Ka Sorkar Meghalaya bad Assam kila rai ban thung da ka Joint Committee ka ban khmih halor ki mat kiba la pynpaw pyrshah da ka Assam ia ka rukom treikam jong ka University of Science and Techology, Meghalaya (USTM) kaba wanrah ka jingshlei um hapoh ki jaka sor ha ka nongbah Guwahati.

Haba pyntip ia kane haka 4 tarik Nailur, u Myntri Rangbah ka Jylla u Conrad K Sangma u la ong, “U Myntri Rangbah ka Assam bad Nga, ngi la rai ha ka jingiakren ban thung da ka Joint Committee kaba rit ka ban ia don bynta da ki heh sorkar na ki ar jylla bad ki ban khmih halor ki jingeh bad ki jingsngewkhia bapher bapher ia kiba la pynpaw da ka Assam bad kiwei pat.”

U la ong ruh ba ki Chief Secretary ki ar jylla ki la iakren halor kane ka jingpynkhreh ban thaw ia kane ka Committee ha kaba yn iakren halor baroh kine ki jingeh bad ki jingsngewkhia, bad ngi kyrmen ba ngin lah ban weng noh ia kiba bun na kine ki jingeh.

Haba kylla, u Conrad u pyntip ba ka sorkar ka la ioh pdiang ia ka jingthoh na ka Assam hadien ka jingiakren bad u CM ka Assam. “Ngi kyrmen ba hapoh ka shitaiew yn lah ban thaw noh ia kane ka Committee,” u la bynrap.

Kum ban shu kdew na ka liang u CM ka Assam u Himanta Biswa Sarma ha kine ki khyndiat taiew ba la lah u la kynnoh ia ka jingleh thurmur jong ka Skulbah USTM ha kaba mait pathar ia ki jaka lum hapoh ka jaka puta jong ka kaba lam sha kane ka jingshlei um kaba jur ha ka nongbah Guwahati.